Waiata 24

¹He hīmene nā Rāwiri. Nō Ihowā te whenua, me ōna tini mea, te ao, me ngā tāngata e noho ana i runga.

²He mea whakatū hoki nāna ki runga ki ngā moana, he mea whakaū ki runga ki ngā roma.

³Ko wai e eke ki te maunga o Ihowā? Ko wai e tū ki tōna wāhi tapu?

⁴Ko te tangata he mā nei ngā ringa, he harakore tōna ngākau, kāhore nei i ara tōna wairua ki te horihori, ā, kāhore i oati teka.

⁵Ka riro i a ia te manaaki a Ihowā, me te tika a te Atua o tōna whakaoranga.

⁶Ko te whakatupuranga tēnei o te hunga e rapu ana ki a ia, e rapu nei i tōu mata, e Hākopa. Hera

⁷Kia ara ō koutou mātenga, e ngā tatau, ara ake, e ngā tatau onamata; ā, ka tomo te Kīngi o te korōria.

⁸Ko wai tēnei Kīngi korōria? Ko Ihowā, ko te kaha, ko te mārohirohi, ko Ihowā, ko te mārohirohi ki te whawhai.

⁹Kia ara ō koutou mātenga, e ngā tatau, kia ara ake, e ngā tatau onamata, ā, ka tomo te Kīngi o te korōria.

¹⁰Ko wai tēnei Kīngi korōria? Ko Ihowā o ngā mano, ko ia te Kīngi korōria. Hera