Taalifi cant 19

¹Mu jëm ci njiital woykat yi, dib taalifu cant, ñeel Daawuda. Asamaan nee Yàlla màgg na, kaw ne màww, biral liggéeyu loxoom!

²Bésoo bés kàddu seede ko, guddee guddi xamle ca mbir.

³Du làkk, duy wax, du baat bu dégtu,

⁴suuf sépp la seen ndéey jibal, seen kàddoo àkki cati àddina. Kaw la Yàlla sampal jant xayma,

⁵mu mel ni boroom séet, génne néegam, bég ni dawkat biy xélu cib joŋante.

⁶Asamaan lay fenke cat lii, wëndeelu, sowi cat lee; amul lu rëcc tàngooram.

⁷Yoonu Aji Sax jee mat, di leqali bakkan. Lu Aji Sax ji seede dëgg la, day xelal ku xeluwul.

⁸Lu Aji Sax ji tegtale, njub la, di bégal xol. Lu Aji Sax ji santaane, leeraange la, di leeral gis-gis.

⁹Santaaneb ragal Aji Sax ji mooy li sell te sax ba fàww. Lu Aji Sax ji digle, dëgg la, ak njub gu sotti.

¹⁰Moo dàq wurus, raw wurusu ngalam wu ne xas; dàqati lem, ëpp tem-tem.

¹¹Man, Sang bi, ci laay leerloo, ku ko sàmm yokku yool.

¹²Nit juum na, umple ko, baal ma tooñ gu ma umple.

¹³Te Sang bi, musal ma ci bàkkaaru teyeef, mu bañ maa jiital, ma mana màndu, mucc moy gu réy.

¹⁴Éy Aji Sax ji, lu saaw làmmiñ tudd mbaa sama xol déey ma ko, yal nay loo gërëm, yaa may aar, yaa ma jot.