Waiata 10

¹He aha koe ka tū mai ai i tawhiti, e Ihowā? Ka whakangarongaro ai i ngā wā o te hē?

²E whakakake ana te tangata kino, e tūkino ana i te tangata iti – kia hopukina rātou ki ngā whakaaro i whakaaro ai rātou.

³E whakapehapeha ana hoki te tangata kino ki te hiahia o tōna ngākau, ā, ko te hunga apo taonga, e whakakāhore ana, āe rā, e whakahāwea ana ki a Ihowā.

⁴Ka mea te tangata kino, i te whakapehapeha o tōna mata, “E kore e hiahiatia e ia.” Kei roto i ōna whakaaro katoa e mea ana, “Kāhore he Atua.”

⁵Whanokē tonu ōna ara i ngā wā katoa; kei runga noa ake āu whakaritenga tē kitea e ia, he mea whakatūpererū e ia ōna hoariri katoa.

⁶E mea ana i roto i tōna ngākau, “E kore ahau e whakakorikoria. Kāhore hoki he hē mōku ā ngā whakatupuranga katoa.”

⁷Kī tonu tōna māngai i te kanga, i te hīanga, i te tūkino; kei raro i tōna arero te whanokē me te teka.

⁸E noho ana ia, e whanga ana i ngā pā koraha; e kōhurutia ana e ia te hunga harakore i ngā wāhi ngaro. E matatau ana ōna kanohi ki te hunga rawakore.

⁹E whanga puku ana ia me he raiona i tōna kuhunga; e whanga ana kia hopukia te tangata iti; e hopukia ana e ia te tangata iti, ua kūmea ki tāna kupenga.

¹⁰Kūpapa ana ia, piko ana, hinga ana te hunga rawakore i āna mea kaha.

¹¹E mea ana i roto i tōna ngākau, “Ka wareware te Atua, e huna ana ia i tōna mata e kore ia e kite ake tonu atu.”

¹²Whakatika, e Ihowā, e te Atua, tākiritia tōu ringa; kaua e wareware ki te hunga iti.

¹³He aha te tangata kino ka whakahāwea ai ki te Atua. Kua mea ia i roto i tōna ngākau, “E kore tēnei e whakatakina e koe”?

¹⁴Kua kite koe; e tirohia nei hoki e koe te whanokē me te whakatoi, ā, ka utua e tōu ringa. E tuku ana te rawakore i a ia anō ki a koe; ko koe hei tuarā mō te pani.

¹⁵Whatia e koe te ringa o te tangata kino; tēnā ko te tangata nanakia, whakatakina tōna kino, kia kāhore rā anō e kitea e koe.

¹⁶Ko Ihowā te Kīngi ake ake kua kāhore kē ngā tauiwi i tōna whenua.

¹⁷E Ihowā, kua whakarongo koe ki te hiahia o te hunga whakaiti; māu anō ō rātou ngākau e whakapai, ka tahuri anō tōu taringa ki te whakarongo;

¹⁸ki te whakawā mō te pani, mō te tangata e tūkinotia ana, kei whakamataku ā mua ake te tangata o te whenua.