Waiata 109

¹Ki te tino kaiwhakatangi. He hīmene nā Rāwiri. E te Atua, e whakamoemiti nei ahau, kei wahangū koe.

²Kua puaki hoki te māngai o te tangata kino me te māngai o te tangata tinihanga, ki te hē mōku; he teka ō rātou arero, e kōrero nei mōku.

³I karapotia hoki ahau e rātou ki ngā kupu mauāhara, ā, i whawhai takekore ki ahau.

⁴Mō tōku aroha he riri tā rātou whakautu; ko ahau ia, he īnoi tāku.

⁵E hōmai ana e rātou ki ahau he kino mō te pai, he mauāhara mō tōku aroha.

⁶“Meinga he tangata kino hei rangatira mōna; kia tū he hoariri ki tōna ringa matau.

⁷Kia tau te hē ki a ia, ina whakawākia; kia waiho anō tāna īnoi hei hara.

⁸Kia torutoru ōna rā; kia riro tāna mahi tirotiro i tētahi atu.

⁹Kia pania āna tamariki, kia pouarutia hoki tāna wahine.

¹⁰Kia kōpikopiko noa āna tamariki, pīnono ai; kia rapu kai hoki mā rātou i ō rātou wāhi mokemoke.

¹¹Kia haoa e te kaituku moni āna mea katoa; kia pāhuatia hoki e ngā tāngata iwi kē āna māuiuitanga.

¹²Kaua tētahi hei hoatu noa i te aroha ki a ia; kaua hoki tētahi hei atawhai i āna pani.

¹³Kia hātepea pūtia ōna uri; ā, i tō muri whakatupuranga kia horoia rawatia atu ō rātou ingoa.

¹⁴Kia maharatia e Ihowā te kino o ōna mātua; kei murua hoki te hara o tōna whaea.

¹⁵Kia mau tonu ki te aroaro o Ihowā; kia hātepea atu ai e ia te maharatanga ki a rātou i runga i te whenua.

¹⁶Mōna kīhai i mahara ki te mahi tohu; heoi, tūkino ana ia i te ware, i te rawakore, i te hunga ngākau marū, kia patua ai rātou.

¹⁷Āe rā, i pai ia ki te kanga, ā, kua tae mai ki a ia; kīhai ia i aro ki te manaaki, heoi kua mamao tērā i a ia.

¹⁸I kākahu ia i te kanga ki a ia, ānō ko tōna kākahu; nā, kua tae tērā ki roto ki a ia ānō he wai, me he hinu hoki ki roto ki ōna wheua.

¹⁹Waiho ki a ia hei kākahu hīpoki mōna, hei whītiki hoki e whītikiria tonutia ai ia.”

²⁰Nā, hei utu tēnā mā Ihowā ki ōku hoariri, ki te hunga hoki e kōrero kino nei ki tōku wairua.

²¹Kia puta tāu mahi mōku, e te Atua, e te Ariki, he whakaaro ki tōu ingoa; nā te mea he pai tāu mahi tohu, whakaorangia ahau.

²²He ware hoki ahau, he rawakore, kua mamae hoki tōku ngākau i roto i ahau.

²³Ka riro ahau me te ātārangi e whakawairua kau ana; e peipeia ana ahau me he māwhitiwhiti.

²⁴Hūrorirori kau ōku turi i te nohopuku; ā, e kohia ana te ngako o ōku kikokiko.

²⁵Kua waiho ahau hei tāwainga mā rātou; ka kite rātou i ahau, ka rūrū ō rātou mātenga.

²⁶Āwhinatia ahau, e Ihowā, e tōku Atua; kia rite ki tōu aroha tāu whakaora i ahau.

²⁷Kia mātau ai rātou ko tōu ringa tēnei; ā, nāu tēnei, e Ihowā, i mea.

²⁸Mā rātou e kanga, māu ia e manaaki; kia whakamā rātou ina whakatika; ko tāu pononga ia kia hari.

²⁹Kia whakakākahuria ōku hoariri ki te whakamā, ā, ko tō rātou numinumi hei koroka hīpoki mō rātou.

³⁰Ka tino whakawhetai tōku māngai ki a Ihowā; āe rā, ka whakamoemiti ahau ki a ia i waenganui o te mano.

³¹E tū hoki ia ki te ringa matau o te rawakore, hei whakaora i a ia i te hunga e whakahē ana i tōna wairua.