1Whakapaingia a Ihowā, e tōku wairua. E Ihowā, e tōku Atua, he nui rawa koe. He hōnore, he korōria ōu kākahu,
2e roropi nei i te mārama ki a koe ānō he kākahu. E hora nei i ngā rangi ānō he kākahu tauārai,
3e whakanoho nei i ngā kurupae o ōna rūma ki ngā wai, e mea nei i ngā kapua hei hāriata mōna, e haere nei i runga i ngā pākau o te hau.
4E mea nei i ngā hau hei karere māna, i te mura ahi hei kaimahi māna.
5Nāna nei i whakatū te whenua ki runga ki ōna tūranga, kei nekenekehia ake ake.
6Nāu anō i hīpoki ki te rire hei kākahu; tū ana ngā wai i runga i ngā maunga.
7Rere ana rātou i tāu riri; tahuti tonu atu i te reo o tāu whatitiri.
8Puke ake ana rā ngā maunga, heke iho ana mā ngā whāwhārua ki te wāhi i whakaritea e koe mō rātou.
9Kua whakatakotoria e koe he rohe kei koni mai rātou, kei hoki mai hei taupoki mō te whenua.
10Nāna i tono ngā puna ki roto ki ngā awaawa, e rere nei i waenga o ngā puke.
11Hei wai mō ngā kīrehe katoa o te pārae; nā noa te matewai o ngā kāihe mohoao.
12Kei reira ngā nohoanga o ngā manu o te rangi, e korihi nei i roto i ngā manga.
13He mea whakamākūkū nāna ngā puke i ōna rūma; ka mākona te whenua i ngā hua o āu mahi.
14Ko ia hei whakatupu i te tarutaru mā te kararehe, i te otaota hei mea mā te tangata, kia whakaputaina ake ai he taro i te whenua,
15he wāina hei whakahari i te ngākau o te tangata, he hinu e pīata ai tōna mata, me te taro hei whakakaha i te ngākau o te tangata.
16Kī tonu i te wai ngā rākau a Ihowā, ngā hīta o Repanōna i whakatōkia e ia.
17Hangā ake e ngā manu he ōhanga ki reira; te tāka, ko ngā kauri tōna whare.
18Hei piringa ngā puke tiketike mō ngā koati mohoao; ngā kōhatu mō ngā rāpeti.
19I hangā e ia te marama hei tohu tāima; e mātau ana te rā ki tōna torengitanga.
20Ko koe hei whakapōuri, ā, kua pō; nā ngōki mai ana ngā kīrehe katoa o te ngahere.
21Ko ngā kūao raiona ngengere ana rātou, he mea kai, he rapu kai mā rātou i te Atua.
22Ko te putanga mai o te rā ka poto atu rātou, takoto ana i ō rātou kuhunga.
23Ko te tangata ka haere ki āna hanga, ki tāna mahi, ā ahiahi noa.
24Anō te tini o āu mahi, e Ihowā! He mōhio rawa tāu mahi i aua mea katoa; kī tonu te whenua i āu taonga.
25Kei kō rā ko te moana, tōna nui tuauriuri; kei reira ngā mea ngōkingōki e kore e taea te tatau, ngā kīrehe hoki, āna nonohi, āna nunui.
26Kei reira ngā kaipuke e teretere ana; kei reira taua rewiatana i hangā e koe hei tākaro ki reira.
27E tatari katoa ana ēnei ki a koe, kia hoatu e koe te kai mā rātou i te wā e tika ai;
28ko tāu e hoatu ai mā rātou, kohikohia ana e rātou; te wherahanga o tōu ringa, mākona tonu rātou i te pai.
29Ko te hunanga o tōu mata, pororaru ana rātou; ka kapohia e koe tō rātou manawa, ka marere rātou, ā, ka hoki anō ki tō rātou puehu.
30Ko tāu tononga mai i tōu wairua, kua hangā rātou; ā, whakahoutia ana e koe te mata o te whenua.
31Kia whai korōria a Ihowā ake ake, kia hari a Ihowā ki āna mahi –
32tāna tirohanga iho ki te whenua, rū ana; kua pā ki ngā puke, nā, pongere ana.
33Ka waiata ahau ki a Ihowā i ahau e ora ana; ka hīmene ki tōku Atua i ahau anō i te ao nei.
34Kia reka tōku whakaaronga ki a ia, ka hari ahau ki a Ihowā.
35Kia mōtī ngā tāngata hara i runga i te whenua, ko te hunga kino kia poto katoa atu. Whakapaingia a Ihowā, e tōku wairua! Whakamoemititia a Ihowā!