Waiata 103

¹Nā Rāwiri. Whakapaingia a Ihowā, e tōku wairua; e ngā mea katoa i roto i ahau, whakapaingia tōna ingoa tapu.

²Whakapaingia a Ihowā, e tōku wairua, kei wareware hoki ki āna painga katoa –

³ko ia te muru nei i ōu kino katoa, te rongoā nei i ōu mate katoa;

⁴ko ia te hoko nei i tōu ora kei ngaro, te karauna nei i a koe ki te atawhai, ki te aroha;

⁵nāna nei i mākona ai tōu māngai i ngā mea papai; i hou ai tōu taitamarikitanga, i rite ai ki tō te ēkara.

⁶Ka puta i a Ihowā ngā mahi tika, me te whakawā tika ki te hunga katoa e tūkinotia ana.

⁷I whakaakona e ia āna ara ki a Mohi, āna mahi ki ngā tama a Īharaira.

⁸Kī tonu a Ihowā i te aroha me te atawhai, he pūhoi ki te riri, he nui hoki tāna mahi tohu.

⁹E kore ia e whakatūpehupehu tonu, e kore anō e mauāhara ake ake.

¹⁰Kīhai i rite ki ō tātou hara āna meatanga ki a tātou; kīhai anō i rite ki ō tātou kino āna utu mai ki a tātou.

¹¹He rite hoki ki te rangi e tiketike ake ana i te whenua, pērā tonu te nui o tāna mahi tohu ki te hunga e wehi ana ki a ia.

¹²Pērā i te matara o te rāwhiti i te uru, pērā tonu tāna whakamataratanga atu i ā tātou mahi tutū i a tātou.

¹³E aroha ana te matua ki āna tamariki, pērā tonu tō Ihowā aroha ki te hunga e wehi ana ki a ia.

¹⁴E mātau ana hoki ia ki tō tātou āhua, e mahara ana he puehu tātou.

¹⁵Ko te tangata ia, rite tonu ōna rā ki ō te tarutaru; kei te puāwai o te māra, ko tōna ngawhātanga.

¹⁶E rārungatia ana hoki e te hau, ā, kua kāhore; kāhore hoki e mōhiotia ā muri e tōna wāhi.

¹⁷Tēnā ko te mahi tohu a Ihowā nō tua whakarere, ā ake tonu ake, ki te hunga e wehi ana ki a ia, tōna tika hoki ki ngā uri o ngā tamariki;

¹⁸ki te hunga e pupuri ana i tāna kawenata, ki te hunga hoki e mahara ana ki āna ako kia mahia.

¹⁹Kua oti i a Ihowā tōna torōna te whakatū ki ngā rangi, ā, e kāwanatia ana ngā mea katoa e tōna kīngitanga.

²⁰Whakapaingia a Ihowā, e āna anahera, e hira nei te kaha, e whakarite nei i tāna kupu, e whakarongo nei ki tōna reo ina kōrero.

²¹Whakapaingia a Ihowā, e āna mano katoa, e āna minita e mahi nei i tāna e pai ai.

²²Whakapaingia a Ihowā, e āna mahi katoa i ngā wāhi katoa o tōna kīngitanga. Whakapaingia a Ihowā, e tōku wairua.