Whakatauki 9

¹Kua oti i te whakaaro nui tētahi whare mōna te hanga, e whitu ngā pou kua oti te tārai e ia.

²Kua oti āna kararehe te patu e ia, whakananu rawa tāna wāina; kua oti anō tāna tēpu te whakapai.

³Kua ungā e ia āna kōtiro, e karanga ana ia i runga i ngā wāhi tiketike rawa o te pā.

⁴“Ki te mea he kūware tētahi, me peka mai ia ki konei!” Ko te tangata maharakore, ko tāna kupu tēnei ki a ia,

⁵“Haere mai, kainga tāku taro, inumia hoki te wāina kua oti nei te whakananu e ahau.

⁶Kāti rā, e te hunga kūware, kia ora ai koutou; haere hoki i te ara o te mātauranga.”

⁷Ko ia e papaki ana i te tangata whakahīhī, ka whakamā; ā, ko ia e riri ana i te tangata kino, ka piri mai he hē ki a ia.

⁸Kaua e rīria te tangata whakahī, kei kino ia ki a koe; rīria ko te tangata whakaaro nui, ā, ka aroha ia ki a koe.

⁹Hoatu te mōhio ki te tangata whakaaro nui, ā, ka neke ake ōna whakaaro; whakaakona te tangata tika, ā, ka nui ake tōna mōhio.

¹⁰Ko te tīmatanga o te whakaaro nui ko te wehi ki a Ihowā; ko te mātauranga, ko te mōhio ki te Mea Tapu.

¹¹Māku hoki ka maha ai ōu rā, māku ka neke ake ai ngā tau e ora ai koe.

¹²Ki te nui ōu whakaaro, mōu anō ōu whakaaro nui; ki te whakahī koe, māu anake tāu pīkaunga.

¹³Ko te wahine wairangi, he māngai nui ia; he kūware ia, kāhore ōna mōhio ki te aha, ki te aha.

¹⁴Noho ana ia i te kūwaha o tōna whare i runga i te nohoanga i ngā wāhi tiketike o te pā;

¹⁵kia karanga atu ai ia ki ngā tāngata e haere ana i te ara, e mārō tonu ana ō rātou huarahi,

¹⁶“Ko te kūware, peka mai ki konei!” Tēnā ko te tangata whakaarokore, ko tāna kupu tēnei ki a ia,

¹⁷“He reka te wai tāhae, ā, he āhuareka te taro kai huna.”

¹⁸Tē mōhio ia kei reira ngā tūpāpaku; kei te rēinga riro ana i karanga ai.