Whakatauki 7

¹E tāku tama, puritia āku kupu, hunā āku whakahau ki roto ki a koe.

²Puritia āku whakahau, ā, ka ora; tāku ture, ānō ko te whatupango o tōu kanohi.

³Herea ki ōu maihao; tuhituhia, ko tōu ngākau ānō hei papa.

⁴Kī atu ki te whakaaro nui, “He tuahine koe nōku,” kīia hoki te mātauranga ko tōu whanaunga wahine.

⁵Kia ai ēnei hei tiaki i a koe kei hē i te wahine kē, i te wahine kē, he kōrero whakapati nei āna.

⁶I titiro atu hoki ahau i te matapihi o tōku whare i roto i tōku whakakahokaho,

⁷ā, i mātakitaki ahau i roto i ngā kūware, i kite i roto i ngā taitama, i tētahi tamaiti kāhore rawa he whakaaro,

⁸e haere ana i te ara i te wāhi tata e piko atu ai ki a ia, ā, haere ana ia i te ara ki tōna whare,

⁹i te kākarauritanga, i te ahiahi o te rā, i te titiwhatanga o te pō, i te pōuri kerekere.

¹⁰Nā, kua tūtaki tētahi wahine ki a ia, he kākahu pūremu tōna, he ngākau hīanga.

¹¹He māngai korokī tōna, he tohetohe; ko ōna waewae, kāhore e tau ki tōna whare;

¹²ināianei kei ngā ara ia, inamata kei ngā waharoa, e tauwhanga ana i ngā kokinga katoa.

¹³Koia i hopukia ai ia e ia, kei te kihi i a ia, ā, ka mea atu ki a ia, me te whakatoi anō i tōna mata:

¹⁴“He patunga mō te pai kei ahau; nō tēnei rā nei ahau i whakamana ai i āku kupu taurangi;

¹⁵koia ahau i haere mai ai ki te whakatau i a koe, ki te āta rapu i tōu mata, ā, ka kitea nei koe e ahau.

¹⁶Ko tōku moenga kua horahia e ahau, whakapaipai rawa ki te kaitaka, ki ngā kākahu purepure nō te rīnena o Īhipa.

¹⁷Kua ruia e ahau tōku moenga ki ngā mea whakakakara, ki te maira, ki te aroe, ki te hinamona.

¹⁸Haere mai, kia whaowhina tāua ki te aroha, ā ao noa; kia ora ō tāua ngākau i te aroha.

¹⁹Kāhore hoki tāku tāne i te whare; kua riro ia, he haere tawhiti.

²⁰I maua atu e ia he pūtea moni i tōna ringa; ka hoki mai anō ia i te kōwhititanga o te marama.”

²¹He maha nō āna kōrero whakawai, riro ana ia i a ia ki tāna; nā te whakapati a ōna ngutu ka kūmea atu ia e ia.

²²Haere tonu ia i muri i a ia, ānō he kau e haere ana kia patua, he kūware rānei e haere ana ki ngā rākau here waewae e whiua ai te hē,

²³ā, tū noa te tao ki tōna ate puta rawa. Rite tonu ia ki te manu e hohoro ana ki te māhanga, tē mōhio he matenga tērā mōna.

²⁴Nō reira, e āku tamariki, whakarongo ki ahau, maharatia ngā kupu a tōku māngai.

²⁵Kei peau kē tōu ngākau ki ōna ara, kei kotiti kē ki ōna huarahi.

²⁶He tokomaha hoki ngā tāngata i tū, i hinga i a ia, āe rā, he ope nui rawa tāna i patu ai.

²⁷He huarahi tōna whare ki te rēinga, e anga ana ki raro ki ngā rūma o te mate.