Whakatauki 6

¹E tāku tama, ki te mea ko tāu hei whakakapi mō tā tōu hoa, ki te mea kua papaki tōu ringa mō te tangata kē,

²kua oti koe te māhanga e ngā kupu a tōu māngai, kua mau koe i ngā kupu a tōu māngai.

³Meinga tēnei ināianei, e tāku tama, kia ora ai koe, he mea hoki kua taka koe ki roto ki te ringa o tōu hoa: haere, whakaiti i a koe, ā, ka tohe ki tōu hoa.

⁴Kei tukua iho te moe ki ōu kanohi; kei tunewha ōu kamo.

⁵Whakaora i a koe ānō he anaterope i roto i te ringa o te kaiwhai, ānō he manu i roto i te ringa o te kaihopu.

⁶Haere ki te pōpokorua, e te tangata māngere, mātakitakina iho ōna ara, kia nui ai ōu whakaaro.

⁷Kāhore nei ōna kaitohutohu, ōna kaitirotiro, ōna rangatira,

⁸heoi, e mahi kai ana māna i te raumati, e kohikohi ana i te kai māna i te kotinga wīti.

⁹Kia pēhea ake te roa o tāu takoto, e te tangata māngere? Āhea koe maranga ai i tāu moe?

¹⁰Kia iti ake nei te wāhi e parangia ai, kia iti ake nei te moe, kia iti ake te kōtuinga o ngā ringa i a koe e takoto nā;

¹¹nā, ka rite ki te kaipāhua te putanga mai o te mūhore ki a koe, tōu rawakore, ānō he tangata he patu nei tāna.

¹²Ko te tangata kāhore ōna painga, ko te tangata hara, e hāereere ana me te māngai tū kē;

¹³e whakakini ana ōna kanohi, e kōrero ana ōna waewae, e tuhi ana ōna maihao;

¹⁴kei roto te whanokē i tōna ngākau, e whakatakoto ana ia i te kino i ngā wā katoa; e rui ana ia i te ngangare.

¹⁵Mō reira ka huaki tata te aituā ki a ia; e kore e aha ka whatia ia, tē taea te rongoā.

¹⁶E ono ngā mea e kino ana ki a Ihowā; āe rā, e whitu ngā mea e whakariharihangia ana e ia:

¹⁷ko te kanohi whakakake, ko te arero teka, ko ngā ringa whakaheke i te toto harakore,

¹⁸he ngākau e whakatakoto ana i ngā whakaaro kikino, he waewae e hohoro ana te rere ki te hīanga,

¹⁹he kaiwhakaatu teka e kōrero teka ana, ko te tangata hoki e rui ana i te ngangare ki waenganui i ngā tuākana, i ngā tēina.

²⁰E tāku tama, puritia te whakahau a tōu pāpā, kaua hoki e whakarērea te ture a tōu whaea.

²¹Kia mau tonu te tākai ki tōu ngākau, heia ki tōu kakī.

²²Ko tōu kaiārahi anō tērā ina haere koe; māna koe e tiaki ina takoto koe; ka kōrero mai anō ki a koe, ina ara koe.

²³He rama hoki te whakahau, ā, he mārama te ture; ko ngā riringa hoki, e whakaako ana, he ara ki te ora.

²⁴Hei tiaki i a koe kei hē i te wahine kino, i te whakapati a te arero o te wahine kē.

²⁵Kei hiahia koe ki tōna ātaahua i roto i tōu ngākau; kei mau anō koe i ōna kamo.

²⁶Ko te tukunga iho o te tangata he wāhi taro, he mea mō te wahine kairau; ko tā te wahine pūremu e whai ana ko te wairua utu nui.

²⁷E taea rānei e te tangata te tango i te ahi ki roto ki tōna uma, ā, e kore ōna kākahu e wera?

²⁸E taea rānei e tētahi te haere i runga i ngā waro ratarata, ā, e kore ōna waewae e hunua?

²⁹Ka pērā anō te tangata e haere ana ki te wahine a tōna hoa; e kore e kore ka whiua te tangata e pā ana ki a ia.

³⁰E kore e whakahāweatia e te tangata te tāhae, ki te tāhaetia e ia he mea e mākona ai tōna wairua ina hiakai ia.

³¹Otiia ki te kitea ia, kia takiwhitu āna e whakautu ai; me hōmai e ia ngā rawa katoa o tōna whare.

³²Ko te tangata e pūremu ana ki te wahine, kāhore ōna mōhio; ko te tangata e pērā ana, kei te whakangaro ia i tōna wairua.

³³He kaiākiko, he whakamā te wāhi mōna; e kore anō tōna ingoa kino e horoia atu.

³⁴He riri nui hoki nā te tangata te hae; e kore anō e tohungia e ia i te rā rapu utu.

³⁵E kore ia e manako ki tētahi utu; e kore hoki e tatū tōna ngākau, ahakoa he nui āu hākari e tāpae ai.