Whakatauki 19

¹He pai kē te rawakore e haere ana i runga i tōna tapatahi, i te ngutu whanokē, i te whakaarokore.

²Nā, ehara hoki i te mea pai kia kaua he mātauranga mō te wairua; ā, ko te tangata e hohoro ana ōna waewae, ka hara.

³E whakaparoritia ana te ara o te tangata e tōna wairangi; e amuamu ana hoki tōna ngākau ki a Ihowā.

⁴Mā te rawa ka tokomaha atu ai ngā hoa aroha; e wehea atu ana ia, te rawakore i tōna hoa aroha.

⁵E kore te kaiwhakapae teka e whakaharakoretia; e kore hoki e mawhiti te tangata kōrero teka.

⁶He tokomaha e whai kia manakohia e te tangata ringa mahora; he hoa aroha hoki ngā tāngata katoa nō te tangata e hōmai mea ana.

⁷E kino ana ngā tēina katoa o te rawakore ki a ia; nā, nui kē atu te mataratanga atu o ōna hoa i a ia! Whai noa āna kupu i a rātou, heoi kua riro rātou.

⁸Ko te tangata e mea ana ki te whakaaro nui mōna, e aroha ana ki tōna wairua ake; ko te tangata e pupuri ana i te mātauranga, ka tūtaki ki te pai.

⁹E kore te kaiwhakapae teka e whakaharakoretia; ka hunā hoki te tangata kōrero teka.

¹⁰E kore e tau te noho rangatira ki te whakaarokore; he makere rawa te noho ko te pononga hei rangatira mō ngā rangatira.

¹¹Ko te ngārahu tūpato ka pupuri i tōna riri; ā, hei whakakorōria mōna te whakarere noa iho i te hē.

¹²Ko te riri o te kīngi rite tonu ki te hāmama o te raiona; ko tana manako ia ānō he tōmairangi i runga i te tarutaru.

¹³He aituā mō tōna pāpā te tamaiti whakaarokore; ā, ko ngā ngangare a te wahine, me te māturuturu pūputu tonu.

¹⁴He whare, he taonga i tuku iho i ngā mātua; ko te hoa wahine mahara i a Ihowā.

¹⁵Mā te māngere e mea kia moe i te moe reka; ka matekai hoki te wairua o te rōrā.

¹⁶Ko te tangata e pupuri ana i te whakahau e pupuri ana i tōna wairua; engari, ko te tangata kore whakaaro ki ōna ara ka mate.

¹⁷Ko te tangata e ohaoha ana ki te rawakore e whakatārewa moni ana ki a Ihowā, ā, ka utua ki a ia tāna mahi atawhai.

¹⁸Pākia tāu tama, i te mea kua whai manakohanga; kaua hoki tōu ngākau e whai tonu i te whakangaromanga mōna.

¹⁹Ko te tangata riri nui māna e waha tōna hē; ki te whakaora hoki koe i a ia, ka waiho tonu tēnā hei mahi māu.

²⁰Whakarongo ki te kupu tohutohu, tahuri mai hoki ki te ako, kia whai whakaaro ai koe i tōu mutunga iho.

²¹He maha ngā whakaaro i roto i te ngākau o te tangata; e tū tonu ana ia tā Ihowā tikanga.

²²Ko te hiahia o te tangata te aronga o tana atawhai; engari te rawakore i te tangata teka.

²³Ko te wehi ki a Ihowā te ara ki te ora; ā, ko te tangata kei a ia tērā, ka noho mākona; e kore tētahi hē e pā ki a ia.

²⁴E kuhua ana e te māngere tōna ringa ki te rīhi, e kore rawa nei e whakahokia e ia ki tōna māngai.

²⁵Pākia te tangata whakahī, ā, ka tūpato ngā kūware; ākona hoki te tangata mahara, ā, ka mōhio ia ki te mātauranga.

²⁶Ko te tangata e pāhua ana i tōna pāpā, e pei atu ana hoki i tōna whaea, he tama ia e whakamā ai, e ingoa kino ai hoki.

²⁷Kāti, e tāku tama, te whakarongo ki te ako hei mea kau e kotiti atu ai i ngā kupu o te mātauranga.

²⁸E whakahī ana te kaiwhakaatu hē ki te whakawā; e horomia ana hoki te kino e te māngai o te hunga kino.

²⁹Kua rite he whakawā mō ngā whakahī, he whiu mō te tuarā o ngā whakaarokore.