Whakatauki 17

¹Ko te maramara kai, ko te mea maroke me te āta noho hei kīnaki, pai atu i te whare kī i ngā hākari a te ngangare.

²Hei rangatira te pononga mahara mō te tama i whakamā ai; ka whai wāhi anō ia i roto i tō ngā tēina.

³Ko te oko tahu para mō te hiriwa, ko te oumu mō te kōura; ko Ihowā ia hei whakamātau mō ngā ngākau.

⁴Ko te kaimahi i te hē ka tahuri ki tā te ngutu kino; ā, ka whai taringa te teka ki tā te arero whanokē.

⁵Ko te taunu ki te rawakore he tāwai ki tōna Kaihanga; ko te tangata e koa ana ki ngā aituā, e kore e kore te whiua.

⁶Hei karauna mō ngā koroheke ngā tamariki a ngā tamariki; nā, ko te korōria o ngā tamariki ko ō rātou mātua.

⁷E kore te reo rangatira e tau ki te kūware; hore rawa anō hoki te ngutu teka ki te rangatira.

⁸Ko te tangata i te mea hōmai noa, he kōhatu whakapaipai tērā ki tāna titiro; tōna tahuritanga ake ki hea, ki hea, ka whiwhi ki te pai.

⁹Ko te tangata e hīpoki ana i te hē, e whai ana i te aroha; tēnā ko te tangata kōrerorero, e wehewehe ana i ngā hoa tupu.

¹⁰Ko te ngotonga o te kupu riri ki roto ki te tangata mātau, nui atu i tō ngā whiu kotahi rau ki roto ki te whakaarokore.

¹¹He whakakeke kau tā te tangata kino e whai ai; nō reira ka tukua atu he karere nanakia ki a ia.

¹²Kia tūtaki ki te tangata te pea kua tangohia āna kūao; pai atu i te whakaarokore i a ia e wairangi ana.

¹³Ko te tangata e hōmai ana i te kino hei utu mō te pai, e kore te kino e neke atu i tōna whare.

¹⁴Ko te tīmatanga o te totohe i rite ki te tangata e tuku ana i te wai kia rere; nā reira waiho atu te totohe i te mea kīanō i oho te ngangare.

¹⁵Ko te tangata e whakatika ana i tā te tangata kino, me ia e whakahē ana i tā te tangata tika, he rite tahi taua rua, he mea whakarihariha ki a Ihowā.

¹⁶Hei aha te utu i te ringa o te kūware, hei hoko i te whakaaro nui, kāhore nei hoki ōna mātauranga?

¹⁷E aroha ana te hoa i ngā wā katoa; nā, ko te teina, ko te tuakana, i whānau tērā mō ngā aituā.

¹⁸Ko tā te tangata ngākaukore he papaki ringa; kua waiho hei whakakapi tūranga i te aroaro o tōna hoa.

¹⁹Ko te tangata e aroha ana ki te ngangare e aroha ana ki te kino; ko te tangata e whakarewa ana i tōna kūwaha e rapu ana i te whakangaromanga.

²⁰Ko te ngākau parori kē e kore e kite i te pai; ko te tangata he whanokē tōna arero ka taka ki te kino.

²¹Ka whānau he whakaarokore mā tētahi tangata, hei whakapōuri tērā mōna; e kore anō hoki e koa te pāpā o te pōauau.

²²He rongoā pai te ngākau koa; ki te marū ia te wairua, ka maroke ngā wheua.

²³E tango ana te tangata kino i te mea whakapati i te uma, hei whakapeau kē i ngā ara o te whakarite whakawā.

²⁴Kei te aroaro o te tangata mātau ngā whakaaro nui; kei ngā pito ia o te whenua ngā kanohi o te whakaarokore.

²⁵Ko te tamaiti whakaarokore he mea whakapōuri i tōna pāpā, he mea whakakawa i te ngākau o tōna whaea.

²⁶Ehara anō hoki i te mea pai kia whiua te tangata tika, kia patua rānei ngā rangatira mō te tika.

²⁷He mātauranga tō te tangata e tohu ana i āna kupu; ā, he whakaaro tō te tangata i te wairua manawanui.

²⁸Ko te wairangi nei anō, ki te whakarongo puku, ka kīia he whakaaro nui; ki te kokopi ōna ngutu, ka kīia ia he tūpato.