Whakatauki 15

¹Mā te kupu ngāwari e kaupare te riri; mā te kupu taimaha ia e whakaoho te riri.

²Ko te arero o te tangata whakaaro nui e whakahua tika ana i te mātauranga; e whakapuaki ana ia te māngai o ngā kūware i te wairangi.

³Kei ngā wāhi katoa ngā kanohi o Ihowā, e titiro ana ki te hunga kino, ki te hunga pai.

⁴Ko te arero reka he rākau nō te ora; tēnā ki te whanokē a roto he wāwāhi wairua.

⁵E whakahāwea ana te wairangi ki te papaki a tōna pāpā; ko te tangata ia e mahara ana ki te ako ka mōhio ki te tūpato.

⁶He nui te taonga kei te whare o te tangata tika; he raruraru ia kei roto i ngā mea hua ki te tangata kino.

⁷E ruia ana te mātauranga e ngā ngutu o ngā whakaaro nui; kāhore ia he pēnā a te ngākau o ngā kūware.

⁸He mea whakarihariha ki a Ihowā te whakahere a te hunga kino; engari, e manako ana ia ki te īnoi a te hunga tika.

⁹He mea whakarihariha ki a Ihowā te huarahi o te tangata kino; ko te tangata ia e whai ana i te tika tāna e aroha ai.

¹⁰He kino te papaki ki te tangata e whakarere ana i te ara; ā, ko te tangata e kino ana ki te ako, ka mate.

¹¹Kei te aroaro o Ihowā te rēinga me te whakangaromanga; engari rawa hoki ngā ngākau o ngā tama a te tangata.

¹²E kore te tangata whakahī e aroha ki te kaipapaki; e kore hoki e haere ki te hunga whakaaro nui.

¹³Mā te koa o te ngākau ka pai ai te mata; mā te pōuri ia o te ngākau ka marū ai te wairua.

¹⁴E rapu ana te ngākau mōhio i te mātauranga; ko te kūware ia tā te māngai o ngā wairangi e kai ai.

¹⁵He kino ngā rā katoa o te hunga pōuri; he hākari tonu tā te tangata i te ngākau mārama.

¹⁶He pai kē te iti i kīnakitia ki te wehi ki a Ihowā, i te nui taonga i kīnakitia ki te raruraru.

¹⁷He pai ake te tina pūwhā ko te aroha hei kīnaki, i te kau whāngai e kīnakitia ana ki te mauāhara.

¹⁸He whakaoho tautohe tā te tangata pukuriri; he pēhi pakanga ia tā te tangata manawanui.

¹⁹Ko te ara o te tangata māngere, ānō he taiepa tātarāmoa; he ara nui ia tō te tangata tika.

²⁰He tama whakaaro nui, ka koa te pāpā; tēnā ko te tama kūware, he whakahāwea ki tōna whaea.

²¹Ki te tangata maharakore he mea whakahari te wairangi; he tika ia te haere a te tangata mātau.

²²Ki te kāhore he rūnanga, ka pororaru ngā tikanga; mā te tokomaha ia o ngā kaiwhakatakoto whakaaro ka mau ai.

²³Kei tā tōna māngai i whakahoki ai he koa mō te tangata; ko te kupu i te wā i tika ai, ānō te pai!

²⁴Ki te tangata whakaaro nui e ahu whakarunga ana te ara ki te ora, he mea kia mahue ai i a ia te rēinga o raro.

²⁵Ka hūtia ake e Ihowā te whare o te tangata whakakake; engari ka whakapūmautia e ia te rohe o te pouaru.

²⁶He mea whakarihariha ki a Ihowā ngā whakaaro nanakia; he mea kohakore ia ngā kupu āhuareka.

²⁷Ko te tangata apo taonga, raruraru ana i a ia tōna whare; ka ora ia te tangata e kino ana ki ngā mea hōmai noa.

²⁸Ko te ngākau o te tangata tika e āta whakaaro ana ki te kupu hei whakahokinga; ko te māngai ia o te tangata kino e tāhoro ana i ngā mea kikino.

²⁹E matara ana a Ihowā i te hunga kino; otiia e rongo ana ia ki te īnoi a te hunga tika.

³⁰Mā te mārama o ngā kanohi ka koa ai te ngākau; ā, mā te rongo pai ka mōmona ai ngā wheua.

³¹Ko te taringa e whakarongo ana ki te whakatūpato e ora ai, ka noho i waenga i te hunga whakaaro nui.

³²Ko te tangata e whakakāhore ana ki te papaki, e whakahāwea ana ki tōna wairua; engari ko te tangata e rongo ana ki te ako, ka whiwhi ki te ngākau mahara.

³³Ko te wehi ki a Ihowā te ako o te whakaaro nui; ko te ngākau whakaiti hoki e haere ana i mua i te hōnore.