1Ko te tangata e aroha ana ki te kupu ako e aroha ana ki te mātauranga; nā, ko te tangata e kore e pai kia rīria tōna hē, he pōauau tērā.
2Ko te tangata pai ka whiwhi ki tā Ihowā whakapai; otiia ka whakahēngia e ia te tangata ngārahu kino.
3E kore tā te tangata e ū i te kino; nā, ko te pakiaka o te hunga tika, e kore tērā e whakakorikoria.
4He wahine e ū ana tōna pai, hei karauna tērā ki tāna tāne; tēnā ko te wahine i whakamā ai ia, hei pirau tērā i roto i ōna wheua.
5Ko ngā whakaaro o te hunga tika he tika; ko ngā whakaaro ia o te hunga kino he tinihanga.
6Ko ngā kupu a te hunga kino e mea ana kia tauwhanga i te toto; mā te māngai ia o te hunga tika rātou ka ora ai.
7Ka hurihia iho te hunga kino, ā, kore iho; ko te whare ia o te hunga tika ka tū tonu.
8Ka rite ki tōna ngārahu te whakamoemiti mō te tangata; ko te ngākau parori kē ia ka whakahāweatia.
9Ko te tangata e whakahāweatia ana, he pononga nei tāna, pai ake ia i te tangata e whakanui ana i a ia anō, ā, kāhore āna kai.
10Ko te tangata tika e whakaaro ana ia ki te ora o tāna kararehe; he nanakia ia ngā mahi atawhai a te hunga kino.
11Ko te tangata e mahi ana i tōna oneone ka mākona ia i te taro; tēnā ko te tangata e whai ana i te hunga tekateka noa, kāhore ōna ngākau mahara.
12Ko tā te tangata kino e minamina ai ko te kupenga a te hunga kino; e whai hua ana ia te pakiaka o te hunga tika.
13Ka mau te tangata kino i te pokanga kētanga o ōna ngutu; ka puta mai ia te tangata tika i roto i te raru.
14Mā ngā hua o tōna māngai ka mākona ai te tangata i te pai; ka riro mai anō i te tangata ngā utu o tā ōna ringa.
15He tika tonu ki ōna kanohi ake te ara o te kūware; e whakarongo ana ia te tangata whakaaro nui ki te kupu whakatūpato.
16Ko te kūware, e mōhiotia wawetia ana tōna riri; e hīpokina ana ia te whakamā e te tangata ngārahu tūpato.
17Ko tā te tangata kōrero pono he whakapuaki i te tika; ko tā te kaiwhakaatu teka ia he tinihanga.
18He tangata anō ko āna kōrero maka noa, me te mea ko ngā werohanga a te hoari; he rongoā ia te arero o te hunga whakaaro nui.
19Ka ū tonu te ngutu pono ā ake ake; mō nāianei kau ia te arero teka.
20He tinihanga kei roto i te ngākau o ngā kaitito i te kino; he koa ia tō ngā kaiwhakatakoto kōrero e mau ai te rongo.
21E kore tētahi kino e pā ki te tangata tika; engari te hunga kino ka kī i te kino.
22He mea whakarihariha ki a Ihowā ngā ngutu teka; ko tāna e āhuareka ai ko ngā kaimahi i te pono.
23Hīpoki ai te tangata tūpato i te mātauranga; e karanga nui ana ia te ngākau o ngā kūware i te kūwaretanga.
24Mō te ringa o ngā uaua te kīngitanga; hei hōmai takoha ia te māngere.
25Mā te pōuri i roto i te ngākau o te tangata e piko ai ia; mā te kupu pai ia ka mārama ai.
26Hira ake te tangata tika i tōna hoa; te hunga kino ia ka whakapōhēhētia e tō rātou ara anō.
27Kāhore te tangata māngere e tunu i tāna mea i hopu ai; mā te tangata uaua ia te taonga utu nui a ngā tāngata.
28He ora kei te ara o te tika; kāhore hoki he mate i tōna ara.