Yunus 2

¹Yunus ñaan ci Yàllaam Aji Sax ji, fa mu tollu ca biir jën wa.

²Mu ne: Maa jàq, woo Aji Sax ji, mu wuyu ma. Ca xóotey njaniiw laa wootee wall, nga dégg ma.

³Yaa ma xalab xóotey xolu géej, ndaw ma mëdd ma. Say wal ak say gannax, lépp a jaare sama kaw.

⁴Man nag ma naan: «Dàqees na ma, ba ma sore la, waaye maay dellu gis sa kër gu sell ga!»

⁵Ndox maa ma tanc ba ci put, xóotey géej mëdd ma, waag ba laxasu sama bopp.

⁶Ca reeni tund ya laa suuxi, caabiy suuf féete ma gannaaw ba fàww, waaye ca kan ma nga jukkee sama bakkan, yaw, sama Yàlla Aji Sax ji.

⁷Noowal bakkan a nga may rëcc, sama xel ne yarr ci yaw, Aji Sax ji, sama ñaan àgg fa yaw, ca sa kër gu sell ga.

⁸Ñiy wormaal neenug neen daal, ñoo dëddu seen yiw fa Yàlla.

⁹Man nag, ci biir cant laa lay sarxale. Li ma xas laay sottal. Wall, fa Aji Sax ji!

¹⁰Ci kaw loolu Aji Sax ji wax ak jën wa, mu goqi Yunus ca tefes ga.