Hopa 33

¹“Tēnā rā, whakarongo, e Hopa, ki āku kōrero, kia whai taringa ki āku kupu katoa.

²Nanā, kua puaki nei tōku māngai, kei te kōrero tōku arero i roto i tōku māngai.

³Mā āku kupu e whakapuaki te tika o tōku ngākau; ka kōrero pono ōku ngutu i tā rātou e mātau ana.

⁴He mea hanga ahau nā te Wairua o te Atua, ā, nā te manawa o te Kaha Rawa ahau i whai ora ai.

⁵Ki te taea e koe, whakahokia mai e koe he kupu ki ahau; whakatikaia āu kōrero ki tōku aroaro; e tū ki runga.

⁶Nanā, ko tōku anga ki te Atua he pēnā hoki i tāu; he mea hanga nei anō hoki ahau ki te paru.

⁷Nanā, e kore te wehi ki ahau e whakawehi i a koe; e kore anō hoki tōku ringa e taimaha iho ki a koe.

⁸“He pono kua hakiri ōku taringa ki āu kupu, ā, kua rongo atu ahau i te reo o āu kupu, e mea ana,

⁹‘He mā ahau, kāhore ōku hē; he harakore ahau, kāhore hoki he kino i roto i ahau.

¹⁰Nā, e rapu ana ia i te take riri ki ahau, e kīia ana ahau e ia he hoariri nōna;

¹¹e karapitia ana e ia ōku waewae ki te rākau, e āta titiro ana ia ki ōku hīkoinga katoa.’

¹²“Nanā, māku e whawhati tāu kupu, ehara tēnei mea āu i te mea tika; nui atu hoki te Atua i te tangata.

¹³He aha koe i totohe ai ki a ia? E kore hoki e kōrerotia e ia te tikanga o tētahi o āna mea.

¹⁴Kotahi hoki, āe rā, e rua kōrerotanga a te Atua, otiia kāhore e maharatia e te tangata.

¹⁵I te moe, i te putanga moemoeā mai o te pō, ina au iho te moe o te tangata, i ngā moenga i runga i te takotoranga;

¹⁶ko reira ia whakapuare ai i ngā taringa o ngā tāngata, hīri ai hoki i te ako mō rātou;

¹⁷kia whakanekehia ai te tangata i tāna whakaaro, kia hīpokina ai hoki te whakapehapeha o te tangata;

¹⁸e puritia ana e ia tōna wairua kei tae ki te rua, tōna ora kei riro i te hoari.

¹⁹E whiua ana hoki ia ki te mamae i runga i tōna moenga, ki te ngau tonu hoki o ōna wheua;

²⁰ā, whakarihariha ana tōna ora ki te taro, tōna wairua ki te kai whakaminamina.

²¹E honia ana ōna kiko, ā, kore noa e kitea; ā, pūrero mai ana ōna wheua kīhai nei i kitea i mua.

²²Heoi, e whakatata ana tōna wairua ki te rua, tōna ora ki ngā kaiwhakamate.

²³“Ki te mea he karere tērā kei a ia, he kaiwhakaatu tikanga tētahi i roto i te mano, hei whakaatu i tōna tika ki te tangata:

²⁴Nā, ka tohu tērā i a ia, ā, ka mea, ‘Whakaorangia ia kei heke ki te rua, kua kitea hoki e ahau he utu.’

²⁵Ko tōna kiri ka ngāwari atu i tō te tamaiti; ka hoki iho ia ki ngā rā o tōna tamarikitanga.

²⁶Ka īnoi ia ki te Atua, ā, ka manako tērā ki a ia; heoi ka kite ia i tōna mata i runga i te koa; ā, ka utua e ia te tika o te tangata.

²⁷E waiata ana ia i te aroaro o ngā tāngata, e mea ana, ‘Kua hara ahau, whakaparoritia ake e ahau te tika, ā, kāhore he pai ki ahau.

²⁸Kua whakaorangia e ia tōku wairua kei riro ki te rua, ā, e kite tōku wairua i te mārama.’

²⁹“Nanā, e meatia ana ēnei mea katoa e te Atua, e tuaruatia ana, āe, e tuatorutia ana, ki te tangata,

³⁰hei whakahoki mai i tōna wairua i roto i te rua, kia whakamāramatia ai ki te mārama o te ora.

³¹“Kia whai whakaaro mai, e Hopa, whakarongo mai ki ahau; kāti tāu, ā, ka kōrero ahau.

³²Ki te mea he kupu tāu, utua mai tāku: kōrero, ko tāku hoki i pai ai kia whakatikaia tāu.

³³Ki te kāhore, whakarongo ki ahau; noho puku koe, ā, māku koe e whakaako ki te whakaaro nui.”