Hopa 27

¹Nā, i kōrero tonu anō a Hopa i tāna pepeha, i mea:

²“E ora ana te Atua, nāna nei i whakakāhore tōku tika; te Kaha Rawa nāna nei i whakakawa tōku wairua;

³kei te toitū tonu hoki tōku ora i roto i ahau, ā, kei roto i ōku pongaponga te Wairua o te Atua;

⁴e pono, e kore ōku ngutu, e kōrero kino, e kore te hīanga e puaki i tōku arero.

⁵Auē kia whakatikaia tā koutou e ahau! E kore e whakarērea e ahau tōku ngākau tapatahi, ā mate noa.

⁶Ka mau tāku pupuri ki tōku tika, e kore e tukua atu e ahau; e kore tōku ngākau e whakahē ki ahau i ahau anō e ora nei.

⁷“Ko tōku hoariri, kia rite ia ki te tangata kino; ko te tangata e whakatika mai ana ki ahau, kia rite ia ki te tangata hara.

⁸He aha oti tā te whakapono kore e tūmanako ai, ahakoa whiwhi ia i te rawa, ki te mea ka tangohia atu tōna wairua e te Atua?

⁹E rongo rānei te Atua ki tāna tangi ina pā te hē ki a ia?

¹⁰E āhuareka rānei ia ki te Kaha Rawa, e karanga rānei ki te Atua i ngā wā katoa?

¹¹“Ka whakaakona koutou e ahau ki te ringa o te Atua; e kore e hunā e ahau ngā mea e takoto mai nei i te Kaha Rawa.

¹²Nanā, kua kite koutou katoa; ā, nā te aha koutou i wairangi rawa ai?

¹³“Ko tā te Atua wāhi tēnei mā te tangata kino, ko te mea e whakarērea iho mā ngā kaitūkino, ko tā te Kaha Rawa e riro i a rātou.

¹⁴Ki te mea ka tokomaha āna tamariki, hei mea mā te hoari; e kore anō hoki ōna uri e mākona i te taro.

¹⁵Ko ōna mōrehu ka tanumia ki te mate; e kore anō hoki āna pouaru e tangi.

¹⁶Ahakoa āmene ia i te hiriwa ānō he puehu, ā, pae tonu te kākahu mōna ānō he paru –

¹⁷e pae anō i a ia, otiia ka kākahuria e te tangata tika, ka wehewehea hoki te hiriwa e te harakore.

¹⁸Ka rite tāna hanga i tōna whare ki tā te pūrehurehu; tōna rite kei te whare tīhokahoka e hangā ana e te kaitiaki.

¹⁹Ka takoto ia, he tangata taonga, otiia e kore e kohia ki te urupā; ko te tirohanga ake a ōna kanohi, nā, kua kāhore noa iho ia.

²⁰Rite tonu ki te wai ngā whakawehi e mau ai ia; tāhaetia ana ia e te paroro i te pō.

²¹Ka kāhakina atu ia e te marangai, ā, riro ana ia; ka āia atu anō ia i tōna wāhi.

²²Ka āki mai hoki te Atua ki a ia, e kore anō ia e tohungia; mea noa ia kia rere mai i roto i tōna ringa.

²³Ka papaki te tangata i ō rātou ringa ki a ia, ā, ka whakahī, ka ā atu i a ia i tōna wāhi.”