Hopa 14

¹“Ko te tangata i whānau i te wahine, he torutoru ōna rā; kī tonu anō i te raruraru,

²ānō he puāwai ia e puta mai ana, e kotia iho ana; rere ana ia, ānō he ātārangi, kāhore hoki he tūmautanga.

³E titiro mai anō rānei ōu kanohi ki te pēnei? E mea rānei koe i ahau kia whakawā tāua ki a tāua?

⁴Ko wai hei hōmai i te mea mā i roto i te mea poke? Hore rawa.

⁵Kua rite nā hoki ngā rā mōna; kei a koe te maha o ōna marama. Takoto rawa i a koe te tikanga mōna, ā, e kore ia e whiti ki tua.

⁶Tahuri kē atu te titiro i a ia, kia ai ōna pārīrātanga, kia āta tutuki ai tōna rā, kia rite ai ki ō te kaimahi.

⁷“Ka ai hoki he whakaaronga ki te rākau i tapahia, tērā anō e pariri, e kore anō hoki e mutu te wana o tōna pihi.

⁸Ahakoa kua tawhitotia tōna pakiaka ki te whenua, ā, kua mate tōna tinana i roto i te oneone;

⁹heoi, mā te haunga o te wai ka pihi, ka kōkiri ōna peka ānō ko tā te mea tupu.

¹⁰Ko te tangata ia, mate iho, marere noa iho; āe, ka hemo te tangata, ā, kei hea ia?

¹¹Pērā i ngā wai e hē mai nei i te moana, i te awa e mimiti ana, ka maroke;

¹²e pērā ana anō te tangata, e takoto ana, ā, kāhore he whakatikanga ake. Kāhore he marangatanga ake mō rātou, ā kia kore rā anō ngā rangi; e kore anō rātou e ara i tō rātou moe.

¹³“Auē, kia hunā noatia oti ahau e koe ki te pō, kia waihotia noatia iho ahau e koe kia ngaro ana, kia hoki rā anō tōu riri; kia rohea noatia mai e koe tētahi wā mōku, ā, ka mahara mai ai anō ki ahau!

¹⁴Ki te mate te tangata, e ora anō rānei ia? Ka tatari ahau i ngā rā katoa o tōku ngananga, kia tae mai rā anō he whakaputanga mōku.

¹⁵Māu e karanga, kia whakaō atu ai ahau; kāhore hoki e kore ka matenui koe ki te mahi a ōu ringa.

¹⁶Ināianei hoki e taua ana e koe ōku hīkoinga; he teka ianei e matatau tonu mai ana koe ki tōku hara?

¹⁷Hīri rawa tōku hē ki roto ki te pūtea, tuitui rawa e koe tōku kino.

¹⁸“He pono ko te maunga e horo ana e memeha noa ake ana, e nekehia ana te toka i tōna wāhi.

¹⁹E ngau ana te wai i ngā kōhatu; mā tōna puhaketanga e horoi atu te puehu o te whenua; ā, whakangaromia iho e koe te tūmanako a te tangata.

²⁰Taea ana ia e koe ake tonu atu, ā, pahure ana ia; puta kē ana i a koe tōna mata, ā, tonoa atu ana ia kia haere.

²¹Ko te whakahōnoretanga o āna tama, kāhore e mōhiotia e ia; ka hoki iho rātou hei ware, heoi kāhore tētahi aha o rātou e maharatia e ia.

²²E mamae anō ia te kikokiko o tōna tinana, ā, ka tangi tōna wairua i roto i a ia.”