Heremaia 23

¹“Auē te mate mō ngā hēpara e whakakorekore nei, e whakamarara nei i āku hipi i hēpara ai!” e ai tā Ihowā.

²Mō reira ko te kupu tēnei a Ihowā, a te Atua o Īharaira mō ngā hēpara e whāngai nei i tāku iwi: “Kua whakamararatia e koutou āku hipi, āia atu ana rātou, kīhai hoki i tirotirohia e koutou. Nanā, ka whiua koutou e ahau mō te kino o ā koutou mahi,” e ai tā Ihowā.

³“Ā, ka huihuia mai e ahau ngā toenga o āku hipi i ngā whenua katoa i peia atu ai rātou e ahau, ka whakahokia mai hoki rātou ki ō rātou puninga, ā, ka hua rātou, ka tini.

⁴Ā, ka whakaarahia ake e ahau ētahi hēpara mō rātou, māna rātou e whāngai; ā, e kore rātou e wehi ā muri ake nei, e kore e pāwera, e kore hoki tētahi e ngaro atu,” e ai tā Ihowā.

⁵“Nanā, kei te haere mai ngā rā,” e ai tā Ihowā, “e whakaarahia ai e ahau he Manga tika mō Rāwiri, ā, ka kīngi ia, he kīngi, ā, ka mahi i runga i te whakaaro nui, ka whakarite hoki i te whakawā, i te tika ki te whenua.

⁶I ōna rā ka whakaorangia a Hūrā, ka noho hūmārie a Īharaira; ā, ko tōna ingoa tēnei e karangatia ai ia: Ko Ihowā Tō Tātou Tika.

⁷Nō reira, nā, kei te haere mai ngā rā,” e ai tā Ihowā, “e kore ai e kōrerotia, ‘E ora ana a Ihowā nāna nei i kawe mai ngā tama a Īharaira i te whenua o Īhipa,’

⁸engari, ‘E ora ana a Ihowā nāna nei i kawe mai, nāna nei i ārahi mai ngā uri o te whare o Īharaira i te whenua ki te raki, i ngā whenua katoa anō i peia atu ai rātou e ahau.’ Ā, ka noho rātou ki tō rātou oneone.”

⁹Nā, mō ngā poropiti: Kei te marū tōku ngākau i roto i ahau, ngāueue ana ōku wheua katoa; e rite ana ahau ki te tangata haurangi, ki te tangata kua mate i te wāina; he whakaaro hoki ki a Ihowā, he whakaaro ki āna kupu tapu.

¹⁰Kei te kapi hoki te whenua i te tangata pūremu; kei te tangi hoki te whenua, he mea mō te kanga; kua maroke ngā wāhi kai o te koraha; ā, ko tō rātou rerenga he kino, ko tō rātou kaha, kāhore i tika.

¹¹“Nō te mea ko te poropiti, ko te tohunga, kua poke ngātahi rāua; āe rā, kua kitea e ahau tō rātou kino i roto i tōku whare,” e ai tā Ihowā.

¹²“Mō reira ka rite tō rātou ara ki a rātou ki ngā wāhi pāhekeheke i roto i te pōuri, ka āia atu rātou, ā, ka taka ki reira. Ka kawea atu hoki e ahau he kino ki runga ki a rātou, ko te tau hoki e tirotirohia ai rātou,” e ai tā Ihowā.

¹³“Ā, kua kite ahau i te wairangi i roto i ngā poropiti o Hamaria: nā Paara tā rātou poropititanga, ā, whakapōhēhētia ana e rātou tāku iwi, a Īharaira.

¹⁴Kei ngā poropiti anō hoki o Hiruhārama, kua kitea e ahau tētahi mea whakahouhou rawa: e pūremu ana rātou, ā, ka haere i runga i te teka, ā, e whakakahangia ana e rātou ngā ringa o ngā kaimahi o te kino, e kore rawa ai tētahi e tahuri mai i tōna kino. Ki ahau kua rite rātou katoa ki Horoma, ā, ko ngā tāngata o reira, koia anō kei o Komora.”

¹⁵Mō reira ko te kupu tēnei a Ihowā o ngā mano mō ngā poropiti: “Nanā, ka whāngaia rātou e ahau ki te taru kawa, ā, ka whakainumia rātou ki te wai kawa; nō te mea i ahu atu i ngā poropiti o Hiruhārama te takahi tapu puta noa i te whenua katoa.”

¹⁶Ko te kupu tēnei a Ihowā o ngā mano: “Kei whakarongo ki ngā kupu a ngā poropiti e poropiti nā ki a koutou; e ako ana rātou i a koutou ki te wairangi. E kōrero ana rātou i te kite a tō rātou ake ngākau, ā, ehara i te mea nā te māngai o Ihowā.

¹⁷E mea tonu ana rātou ki te hunga e whakahāwea ana ki ahau, ‘kua kī mai a Ihowā: Ka mau te rongo ki a koutou’; ā, ki te hunga katoa e haere ana i runga i ngā tikanga pakeke o ō rātou ngākau, e mea ana rātou, ‘E kore te kino e tae mai ki a koutou.’

¹⁸Ko wai oti i tū i runga i tō Ihowā whakaaro, e kite ai, e rongo ai rānei ki tāna kupu? Ko wai i mahara ki tāku kupu, i rongo hoki?

¹⁹Nanā, kua puta te tūkauati i a Ihowā, koia anō ko tōna riri, āe rā, he tūkauati pōwaiwai; tērā e pakaru ki runga ki te upoko o te hunga kino.

²⁰E kore e hoki tō Ihowā riri, kia oti rā anō, kia whakapūmautia rā anō e ia ngā whakaaro o tōna ngākau. I ngā rā whakamutunga ka tino mārama koutou.

²¹Kīhai ahau i unga i ēnei poropiti, heoi rere ana rātou; kīhai ahau i kōrero ki a rātou, heoi kei te poropiti rātou.

²²Otiia me i tū rātou i runga i tōku whakaaro, kua meinga e rātou tāku iwi kia rongo ki āku kupu, kua whakahokia mai e rātou i tō rātou ara kino, i te kino hoki o ā rātou mahi.

²³“He Atua tata ianei ahau,” e ai tā Ihowā, “ā, ehara i te Atua i tawhiti?

²⁴E taea rānei e tētahi te huna i a ia ki ngā wāhi ngaro, e kore ai ia e kitea e ahau?” e ai tā Ihowā. “He teka ianei kapi tonu i ahau te rangi me te whenua?” e ai tā Ihowā.

²⁵“Kua rongo ahau i ngā kupu a ngā poropiti, e poropiti teka nā i runga i tōku ingoa, e mea nā, ‘He moe nāku, he moe nāku.’

²⁶Kia pēhea te roa o te mau o tēnei i roto i te ngākau o ngā poropiti, e poropiti teka nā; arā o ngā poropiti, e poropiti nā i te tinihanga o tō rātou ngākau?

²⁷E whakaaro nā, mā ā rātou moe e kōrerotia nā e rātou ki tōna hoa, ki tōna hoa, ka meinga ai tāku iwi kia wareware ki tōku ingoa, kia pērā me ō rātou mātua i wareware nei ki tōku ingoa, i mea nei ki a Paara.

²⁸Ko te poropiti he moe nei tāna, me kōrero e ia te moe, ā, ko te tangata i a ia tāku kupu, kia pono tāna kōrero i tāku kupu. He aha oti tā te pāpapa ki te wīti?” e ai tā Ihowā.

²⁹“He teka ianei e rite ana tāku kupu ki te ahi?” e ai tā Ihowā; “ki te hama e wāhi nei i te kāmaka ā mongamonga noa?”

³⁰“Mō reira, nā, hei hoariri ahau mō ngā poropiti,” e ai tā Ihowā, “e tāhae nei i āku kupu i tōna hoa, i tōna hoa.

³¹Nanā, hei hoariri ahau mō ngā poropiti,” e ai tā Ihowā, “mō te hunga e whakamahi nei i ō rātou arero, e kī nei, ‘E mea ana ia.’

³²Nanā, hei hoariri ahau,” e ai tā Ihowā, “mō te hunga e poropiti ana i ngā moe teka, ā, kōrerotia ana e rātou, whakapōhēhētia ana e rātou tāku iwi ki ā rātou kōrero teka, ki tā rātou whakapehapeha wairangi. Otiia, ehara rātou i ahau i unga, i whakahau rānei; e kore rawa hoki tēnei iwi e whai pai i a rātou,” e ai tā Ihowā.

³³“Ā, ki te ui tēnei iwi ki a koe, te poropiti, te tohunga rānei, ki te mea, ‘Tēnā koa tā Ihowā pīkaunga?’ Kātahi koe ka kī atu ki a rātou, ‘E tae te pīkaunga! Ka makā atu koutou e ahau, e ai tā Ihowā.’

³⁴Nā, ko te poropiti, ko te tohunga, ko te iwi rānei, e mea ana, ‘Ko te pīkaunga a Ihowā,’ ka whiua e ahau taua tangata, rātou ko tōna whare.

³⁵Ko te kupu tēnei mā koutou ki tōna hoa, ki tōna hoa, ki tōna teina, ki tōna tuakana, ‘Tēnā koa te kupu i whakahokia mai e Ihowā?’ ā, ‘I pēhea mai a Ihowā?’

³⁶Kāti hoki tā koutou whakahua i te pīkaunga a Ihowā; nō te mea ko te kupu ake a tēnei, a tēnei hei pīkaunga māna; kua whakarerekētia hoki, koutou ngā kupu a te Atua ora, a Ihowā o ngā mano, a tō tātou Atua.

³⁷“Ko tāu tēnei e kōrero atu ai ki te poropiti, ‘He aha te whakautu a Ihowā ki a koe?’ Ko tēnei hoki, ‘I pēhea mai a Ihowā?’

³⁸Engari ki te mea koutou, ‘Ko te pīkaunga a Ihowā.’ Nā, ko te kupu tēnei a Ihowā: Mō tā koutou kōrero i tēnā kupu, ‘ko te pīkaunga a Ihowā,’ ā, kua unga tangata ahau ki a koutou, hei mea, Kaua koutou e kī, ‘ko te pīkaunga a Ihowā.’

³⁹Mō reira, nā, ka wareware rawa ahau ki a koutou, ka ākiritia atu anō koutou i tōku aroaro, me te pā i hoatu e ahau ki a koutou ko ō koutou mātua.

⁴⁰Ka utaina hoki e ahau he ingoa kino ki runga ki a koutou, he mea mau tonu, he whakamā hoki e mau tonu ana, ā, e kore e wareware.”