1“Ko te kupu tēnei a Ihowā ki tāna i whakawahi ai, ki a Hairuha, he mea pupuri nei nāku tōna ringa matau, kia pēhia ai e ia ngā iwi ki raro i a ia; māku anō e wewete tō ngā hope o ngā kīngi; ko ngā tatau ka whakapuaretia ki tōna aroaro; e kore anō ngā kūwaha e tūtakina:
2Ko ahau e haere i mua i a koe, ki te whakatikatika i ngā wāhi tāpokopoko; ko ngā tatau parāhi ka pakaru i ahau; ka tapahia anō e ahau ngā tūtaki rino.
3Ka hoatu anō e ahau ki a koe ngā taonga o te pōuri, me ngā mea huna o ngā wāhi ngaro, kia mōhio ai koe ko Ihowā ahau, e whakahua atu nei i tōu ingoa, ko te Atua o Īharaira.
4He whakaaro nāku ki tāku pononga, ki a Hākopa, ki a Īharaira, ki tāku i whiriwhiri ai, nā reira koe, tōu ingoa, i karangatia ai e ahau; whakahuatia ana e ahau tōu ingoa i te mea kāhore anō koe kia mōhio ki ahau.
5Ko Ihowā ahau, kāhore atu hoki; kāhore kē atu he Atua, ko ahau anake; māku koe e whītiki, ahakoa kāhore koe i mōhio ki ahau;
6kia mōhio ai te hunga i te rāwhiti me o te uru, kāhore atu, ko ahau anake. Ko Ihowā ahau, kāhore kē atu.
7Nāku te mārama i whai āhua ai, nāku i hanga te pōuri; ko ahau te kaihohou rongo, te kaihanga anō o te kino; ko ahau, ko Ihowā, te kaimahi o ēnei mea katoa.
8“Māturuturu iho, e ngā rangi i runga; kia ringihia mai anō he tika e ngā kapua; kia puare te whenua, kia hua te whakaora, kia wana ngātahi te tika; nāku, nā Ihowā, taua mea i hanga.
9“Auē te mate mō te tangata e totohe ana ki tōna Kaiwhakaahua! He maramara rīhi i roto i ngā maramara rīhi o te oneone! E mea ake rānei te paru ki tōna kaiwhakaahua, ‘He aha tāu e mahi nā’? E mea rānei tāu i hanga ai, ‘Kāhore ōna ringa?’
10Auē te mate mō te tangata e mea ana ki tōna pāpā, ‘He aha tāu kua whānau nei?’ ki te wahine rānei, ‘He aha te mea ka whakamamae nā koe?’ ”
11Ko te kupu tēnei a Ihowā, a te Mea Tapu o Īharaira, a tōna Kaiwhakaahua anō: “Uia mai ki ahau ngā mea e puta mai ā mua, ko ngā meatanga ki āku tamariki, ki te mahi hoki a ōku ringa, whakahaua mai ahau e koe.
12Nāku i mahi te whenua, i hanga hoki ngā tāngata o runga; nāku, nā ōku ringa i hora ngā rangi; ko ō rātou mano katoa he mea whakahau nāku.
13Nāku ia i whakaara ake i runga i te tika, māku anō e whakatikatika ōna ara katoa; ko ia hei hanga i tōku pā, hei tuku i āku pārau kia haere, kāhore hoki he utu, kāhore he moni whakapati, e ai tā Ihowā o ngā mano.”
14Ko te kupu tēnei a Ihowā: “Ko ngā māuiui o Īhipa, ko ngā taonga hokohoko o Etiopia, ko ngā Tapeani, he tāngata roroa, ka tae mai ki a koe, ā, ka riro i a koe; ka whai rātou i a koe; ka tae mekameka mai, ka piko ki a koe, ka mea, ‘He pono kei roto i a koe te Atua, kāhore atu hoki, kāhore he Atua.’ ”
15He pono he Atua koe e whakangaro ana i a koe, e te Atua o Īharaira, e te Kaiwhakaora.
16Ka whakamā, āe rā, ka numinumi kau rātou katoa; ka riro ngātahi ki te whakamā ngā kaimahi o ngā whakapakoko.
17Ko Īharaira ia, ka ora i roto i a Ihowā, he whakaoranga pūmau tonu; e kore koutou e whakamā, e kore e numinumi ā ake ake.
18Ko te kupu hoki tēnei a Ihowā, a te kaihanga o ngā rangi; ko ia te Atua; nāna i whakawhaiahua te whenua, nāna i mahi; nāna i whakapūmau, kīhai i hangā e ia hei takoto kau, i whakaahuatia e ia hei nohoanga: “Ko Ihowā ahau, kāhore kē atu.
19Kīhai ahau i kōrero i te wāhi ngaro, i te wāhi pōuri o te whenua; kīhai ahau i mea ki te uri o Hākopa, ‘Rapua ahau, he mea noa iho.’ Ko tāku kōrero, ko tā Ihowā, kei te tika, e whakaatu ana i ngā mea e rite ana.”
20“Huihui, haere mai, whakatata ngātahi mai, e ngā oranga o ngā iwi. Kāhore he mōhio o te hunga e mau ana i te rākau o tā rātou whakapakoko, e īnoi ana ki te atua e kore nei e whakaora.
21Whakaaturia, kawea mai kia tata, kia whakatakoto whakaaro ngātahi rātou. Nā wai tēnei i kōrero i mua riro, nā wai i whakaatu i ngā wā onamata? He teka ianei nāku, nā Ihowā? Kore atu hoki he atua, ko ahau anake; he Atua tika, he kaiwhakaora; kāhore kē atu, ko ahau anake.
22“Tahuri mai ki ahau, kia ora ai koutou, e ngā pito katoa o te whenua; ko te Atua hoki ahau, kāhore kē atu.
23Kua waiho ahau e ahau anō hei oati; kua puta atu te kupu i tōku māngai i runga i te tika, e kore anō e hoki mai, arā: ‘Ka tūturi ngā turi katoa ki ahau, ka oati mai anō ngā arero katoa.’
24“Ka mea mai tētahi ki ahau, ‘Kei a Ihowā anake te tika, te kaha.’ Ka haere mai ki a ia ngā tāngata, ā, ko ngā tāngata katoa i riri ki a ia ka whakamā.
25Mā Ihowā ka tika ai, ka whakamanamana ai te uri katoa o Īharaira.”