1“Auē te mate mō ngā tamariki whakakeke,” e ai tā Ihowā, “e hanga whakaaro nei, otiia ehara i te mea nāku; e hīpoki nei i te hīpoki, ehara ia i te mea nā tōku wairua, he mea kia taparua iho ai e rātou he hara ki runga ki te hara;
2e haere nei ki raro ki Īhipa, kāhore hoki e ui tikanga ki tōku māngai; hei kaha hoki mō rātou te kaha o Parao, ā, e mea ana kia whakawhirinaki ki te taumarumarunga iho o Īhipa.
3Mō reira hei mea whakamā ki a koutou te kaha o Parao, hei mea anō e numinumi ai koutou te whakawhirinaki ki te taumarumarunga iho o Īhipa.
4I Toana hoki āna rangatira, i tae anō āna karere ki Hanahe,
5whakamā katoa rātou ki te iwi kāhore nei ā rātou pai mō rātou, kāhore he āwhina, kāhore he pai; engari he whakamā, he ingoa kino.”
6Ko te poropititanga mō ngā kararehe o te tonga. I te whenua o te raruraru, o te ngākau mamae, nō reira nei te raiona uha me te raiona toa, te waipera me te nākahi e rere nei me he ahi, ka kawea atu e rātou ō rātou rawa i runga i ngā pokohiwi o ngā kūao kāihe, ō rātou taonga i runga i ngā koropuku o ngā kāmera ki te iwi kāhore nei ā rātou pai mō rātou.
7Ko tā Īhipa āwhina hoki he horihori, he kore noa iho; koia i huaina ai e ahau, “Ko Rahapa noho tonu.”
8Nā, haere, tuhituhia ki te papa ki tō rātou aroaro, tāia iho hoki ki te pukapuka; me waiho anō tēnā i ngā rā i muri hei kaiwhakaatu ā ake ake.
9He tutū hoki tēnei iwi, he tamariki kōrero teka, he tamariki kāhore e pai ki te whakarongo ki te Ture a Ihowā;
10ko tā rātou nei kupu ki ngā matakite, “Kaua e kite!” ki ngā poropiti, “Kaua e poropititia ki a mātou ngā mea tika; kōrero ki a mātou i ngā mea ngāwari; hei ngā mea tinihanga he poropititanga mā koutou;
11peka atu i te ara, whakarērea te huarahi, kāti tā te Mea Tapu o Īharaira te mea mai ki tō mātou aroaro.”
12Nā, ko te kupu tēnei a te Mea Tapu o Īharaira: “Kua paopao nā koutou ki tēnei kupu, kua okioki anō ki te tūkino, ki te whanokē, ū tonu atu ki reira;
13nā, ko te tukunga iho o tēnei hē ki a koutou, ka rite ki te pakaru o te taiepa, meāke nei hinga, kua ngawhā haere i te wāhi tiketike, kitea rawatia ake, kua puta whakarere tōna pakaru.
14Ka wāhia hoki e ia, pērā i te oko a te kaihanga rīhi e wāhia ana, mongamonga noa, e kore e tohungia; nā, e kore e kitea i roto i ōna kongakonga he maramara hei tango ahi mai i te kānga ahi, hei utu wai ake rānei i te poka.”
15Ko te kupu hoki tēnei a te Ariki, a Ihowā, a te Mea Tapu o Īharaira: “Mā te tahuri mai, mā te hūmārie ka ora ai koutou; kei te āta noho, kei te whakawhirinaki he kaha mō koutou; heoi kīhai koutou i pai.
16Nā, i kī nā koutou, ‘Kāhore, engari me rere mātou i runga i te hōiho.’ Mō reira ka rere koutou; ā, ‘Ka eke mātou ki runga ki te mea tere.’ Mō reira ka tere anō te hunga e whai ana i a koutou.
17Ko te mano kotahi, ka rere i te riri a te tangata kotahi; ka rere koutou i te riri a te tokorima; ā, ka mahue koutou ānō he pou kara i te tihi o te maunga, ānō he kara i runga i te pukepuke.”
18Nā konei anō a Ihowā ka tatari, he mea kia atawhaitia ai koutou e ia, nā konei anō ia ka whakanekehia ake, kia tohungia ai koutou e ia. He Atua whakawā hoki a Ihowā, ka hari te hunga katoa e tatari ana ki a ia.
19Tērā hoki te iwi e noho ki Hiona, ki Hiruhārama; mutu ake tōu tangi. He pono ka aroha ia ki a koe, ki tōu reo e tangi ana; ka rongo ia ki a koe, ka whakahoki kupu ia ki a koe.
20Ahakoa hōmai e te Ariki hei taro mā koutou ko te ngākau mamae, hei wai anō ko te tūkino, e kore ōu kaiwhakaako e hunā ā muri; engari ka kite ōu kanohi i ōu kaiwhakaako.
21Ā, ka rongo ōu taringa i te kupu i muri i a koe e mea ana, “Ko te ara tēnei; nā konei atu, ina tahuri koutou ki matau, ina tahuri ki mauī.”
22Ka whakapokea hoki e koutou te kōpaki o āu whakapakoko hiriwa, me te mea whakakikorua o āu whakapakoko kōura whakarewa; ka rukerukea atu e koe, ānō he mea poke, ā, ka mea ki taua mea, “Haere atu!”
23Ā, ka hōmai e ia he ua ki tāu purapura e whakatōkia e koe ki te oneone, he taro anō, he hua nō te oneone, ā, ka whai ngako, ka nui taua mea; i taua rā anō he nunui ngā pārae e kai ai āu kararehe.
24Ā, ko ngā kau, me ngā kūao kāihe e mahi ana i te oneone, ka kai i te kai pai, he mea i whakarererea ki te koko, ki te whakarerere wīti;
25ā, i runga i ngā maunga tiketike katoa, i ngā pukepuke ikeike katoa, ka rere he awa, he manga wai – i te rā o te parekura nui, ina hinga ngā pourewa.
26Ko te mārama hoki o te marama ka rite ki te mārama o te rā, ā, ko te mārama o te rā, e whitu ōna whakanekehanga ake, ka rite ki te mārama o ngā rā e whitu, i te rā e takaia ai e Ihowā te kaiākiko o tāna iwi, ina rongoātia e ia te patunga i patua ai rātou.
27Nanā, kei te haere mai te ingoa o Ihowā i tawhiti, kā tonu tōna riri, pongere tonu te paowa e kake ana; kī tonu ōna ngutu i te riri, ko tōna arero koia anō kei te ahi e kai ana.
28Ko tōna manawa, ānō he awa e ngawhā ana, tae ana ki te kakī rawa – hei tātari i ngā iwi ki te tātari o te horihori; ā, mau rawa ki ngā kauae o ngā iwi he paraire, hei whakapōhēhē i a rātou.
29Ka waiata koutou, me te mea ko te pō e mahia ai te hākari tapu; ka koa te ngākau, ānō he tangata e haere ana me tāna pūtōrino, e haere ana ki te maunga o Ihowā, ki te Kāmaka o Īharaira.
30Ka meinga hoki e Ihowā tōna reo korōria kia rangona, kia kitea te tautanga iho o tōna ringa, me te weriweri o tōna riri, te mura o te ahi e kai ana, te apū hau, te tūpuhi, me te nganga kōhatu.
31Mā te reo hoki o Ihowā ka pakaru ai te Ahiriana i whiu nei ki te rākau.
32Ā, ko ngā whakapānga katoa o te tokotoko i whakaritea, ko tā Ihowā hoki e whakapā ai ki a ia, ka meinga ki ngā timipera, ki ngā hāpa; he whawhai whakangāueue hoki tāna whawhai ki a rātou.
33Nō mua iho hoki a Topete i whakaritea ai; āe rā, kua rite mō te kīngi; kua oti te whakahōhonu, te whakanui; ko tōna pūranga he ahi, nui atu hoki te wahie; ko te manawa o Ihowā, ānō he awa whānāriki, hei whakangiha.