1Auē te hē mō te karauna whakapehapeha o te hunga haurangi o Ēparaima, ki te puāwai memenge hoki o tōna ātaahua whakakorōria, tērā i te wāhi ki runga o te awaawa mōmona o te hunga kua hinga i te wāina!
2Nanā, he mea kaha, he mea pakari tā te Ariki; koia anō kei te āwhā whatu, kei te tūpuhi e wāwāhi ana, kei te waipuke, he wai nui e ngawhā atu ana, ka tāia iho anō e tōna ringa ki te whenua.
3Ka takahia e ngā waewae te karauna whakapehapeha o te hunga haurangi o Ēparaima.
4Ā, ko te puāwai memenge o tōna ātaahua whakakorōria, kei te wāhi nei ki runga o te awaawa mōmona, ka rite ki te hua mātāmua o te piki i te mea kāhore anō te raumati; ā, ka kite te mea i titiro atu, ka horomia e ia i te mea kei tōna ringa anō.
5I taua rā ko Ihowā o ngā mano hei karauna korōria, hei pōtae ātaahua ki ngā mōrehu o tāna iwi;
6hei wairua whakawā ki te tangata e noho ana ki te whakawā, hei kaha mō te hunga e whakahoki ana i te whawhai i te kūwaha.
7Otiia kua pōhēhē anō ēnei i te wāina, ā, kua kotiti kē i te wai kaha; ko te tohunga, ko te poropiti, kua pōhēhē i te wai kaha, kua horomia rāua e te wāina, ā, kua kotiti kē i te wai kaha; he titiro hē tā rāua, e tapepa ana tā rāua whakawā.
8Kī tonu hoki ngā tēpu katoa i te ruaki, i te paru, kāhore he wāhi mā.
9“Ko wai e whakaakona e ia ki te mātauranga? Ko wai e meinga e ia kia mōhio ki te kupu? Ko te hunga kua whakamutua tā rātou kai waiū, kua tangohia mai i te ū?
10He whakahau nei hoki tēnei i runga i te whakahau, he whakahau i runga i te whakahau; he ako i runga i te ako, he ako i runga i te ako; he iti ki konei, he iti ki kō rā.”
11Engari mā ētahi tāngata rerekē ngā ngutu, he reo kē te reo e kōrero ai ia ki tēnei iwi;
12i kī atu ia ki a rātou, “Ko te okiokinga tēnei, hoatu e koutou he okiokinga ki te tangata māuiui; ko te tānga manawa hoki tēnei”; nā, kīhai rātou i pai ki te whakarongo.
13Nō reira, ko tā Ihowā kupu ki a rātou: “He whakahau i runga i te whakahau, he whakahau i runga i te whakahau; he ako i runga i te ako, he ako i runga i te ako; he wāhi iti ki konei, he wāhi iti ki kō rā;” kia haere ai rātou, ka hinga whakamuri, ka wāwāhia, ka māhangatia, ka mau.
14Mō reira whakarongo ki te kupu a Ihowā, e te hunga whakahī, e ngā rangatira o tēnei iwi i Hiruhārama.
15Kua mea nā hoki koutou, “Kua whakarite kawenata mātou ki te mate; kua rite ā mātou whakarite ko te rēinga; ki te pāha i waenga te whiu i rite nei ki te waipuke, e kore e tae mai ki a mātou; nō te mea kua oti te teka te mea e mātou hei whakawhirinakitanga, ka piri mātou ki roto ki te horihori.”
16Nā, ko te kupu tēnei a te Ariki, a Ihowā: “Nanā, tēnei ahau te whakatakoto nei i te kōhatu ki Hiona hei tūranga, he kōhatu kua oti te whakamātautau, mō te kokonga, he mea utu nui, he tūranga ū; ko te tangata e whakapono ana e kore e pōtatutatu.
17Ka whakatakotoria anō e ahau te tikanga o te whakawā, mea rawa ki te aho, me te tika anō, paramu rawa; ā, ka tahia atu te whakawhirinakitanga teka e te whatu, ka huri anō ngā wai ki runga ki te piringa.
18Ka whakatakā hoki tā koutou kawenata ki te mate; e kore anō e tū tā koutou i whakarite ai ki te rēinga; ko te whiu i rite nei ki te waipuke, ki te tika atu i waenga, ka waiho koutou hei takahanga māna.
19I ōna wā e haere atu ai taua whiu, ka riro koutou i a ia; ka haere atu hoki i tēnei ata, i tēnei ata, i te ao, i te pō; ā, he whakamataku anake te mea kia mōhio ki te kupu.”
20He poto hoki te moenga, e kore e whārōrō te tangata; he whāiti te hīpoki, e kore e taea te roropi mai.
21Nō te mea ka rite ki tērā i Maunga Peratimi tō Ihowā whakatikanga ake, kei tērā i te raorao i Kipeono te rite o tōna riri; kia mahi ai ia i tāna mahi, i tāna mahi rerekē, kia whakatutuki ai i tāna hanga, i tāna hanga rerekē.
22Nā, kāti rā tā koutou whakahī, kei whakaūkia ō koutou here; kua rongo nei hoki ahau ki te Ariki, ki a Ihowā o ngā mano, ki te whakaotinga, ki te mea i whakaritea mō te whenua katoa.
23Kia whai taringa mai, whakarongo hoki ki tōku reo; mahara mai, whakarongo ki tāku kōrero.
24Ko tā te kaiparau koia i ngā rā katoa he parau, hei whakatōkanga? He whakatuwhera tonu rānei tāna, he wāwāhi i ngā pōkurukuru o tōna oneone?
25Ka oti i a ia te mata o taua māra te mea kia rite, e kore ianei ia e maka atu i te pī, e whakatō i te kumine, e rui i te wīti, rārangi rawa, i te pārei ki te wāhi i whakaritea, me te rai anō ki tōna tapa?
26Ko tōna Atua hoki hei whakaako i a ia ki te tikanga pai, hei tohutohu anō i a ia.
27E kore hoki ngā pī e patua ki te mea koi, e kore anō te wīra kāta e hurihia ki runga ki te kumine; engari e patua ana ngā pī ki te rākau, ngā kumine ki te patupatu.
28Ko te wīti hei taro e kurua ana; e kore hoki e patua tonutia e ia. Nā, ahakoa tohaina e te wīra o tāna kāta, e ana hōiho rānei, kāhore e tukia e ia kia ririki.
29E puta mai ana hoki tēnei i a Ihowā o ngā mano, he mea whakamīharo nei ōna whakaaro, he nui anō āna tikanga.