Ihāia 10

¹Auē te mate mō te hunga e whakatakoto ana i ngā tikanga hē, mō ngā kaituhituhi anō hoki e tuhituhi nei i te mea nanakia;

²hei whakakotiti kē i te whakawā mō ngā rawakore, hei tango noa iho i te mea e tika ana mā ngā ware o tōku iwi, kia waiho ai ngā mea a te pouaru hei taonga mā rātou, kia pāhuatia ai e rātou ngā pani!

³Ka pēhea rā koutou i te rā o te tirohanga mai, o te whakangaromanga ka pā mai i tawhiti? Ka rere koutou ki a wai hei āwhina, ā, ka waiho tō koutou korōria ki hea?

⁴Ka piko noa iho rātou ki raro i ngā herehere, ka hinga ki raro i te iwi i patua. Ahakoa ko tēnei katoa, e kore tōna riri e tahuri kē, engari mārō tonu tōna ringa.

⁵“Auē, e te Ahiriana, te rākau o tōku riri, te whiu kei tōna ringa ko tōku āritarita!

⁶Ka ungā ia e ahau ki te iwi ngutukau; he hē mō te iwi o tōku riri tāku e whakahau ai ki a ia, ki te taonga parakete māna, ki te pāhua, ki te mea i a rātou hei takahanga, hei pērā me te paru o ngā ara.

⁷Kāhore ia ōna whakaaro pēnei, kīhai hoki tōna ngākau i mea ki te pēnei; engari he whakangaro tā tōna ngākau, kia kaua anō hoki e torutoru ngā iwi e hātepea e ia.

⁸E kī ana hoki ia: ‘He teka ianei he kīngi katoa āku rangatira?

⁹He teka ianei he rite a Karano ki Karakemihi, he rite a Hāmata ki Ārapara, he rite a Hamaria ki Ramahiku?

¹⁰Ka rite ki ngā kīngitanga o ngā whakapakoko i tūpono mai ki tōku ringa; nui atu nei hoki ō rātou whakapakoko i o Hiruhārama, i o Hamaria;

¹¹e kore ianei tāku e mea ai ki Hiruhārama, ki ōna whakapakoko, e rite ki tāku i mea ai ki Hamaria, ki ōna whakapakoko?’ ”

¹²Nā, tēnei ake, kia oti i te Ariki tāna mahi katoa ki Maunga Hiona, ki Hiruhārama, “Ka whiua e ahau ngā hua o te ngākau nui o te kīngi o Ahiria, me te korōria anō o ōna kanohi whakakake.

¹³Kua kī nā hoki ia: ‘Nā te kaha o tōku ringa i oti ai tēnei i ahau, nā tōku whakaaro nui, he tangata whai mahara hoki ahau. Kua whakanekehia hoki e ahau ngā rohe o ngā iwi, kua pāhuatia anō e ahau ō rātou taonga, ā, kua riro i ahau, i te mārohirohi, ki raro te hunga noho o ngā torōna.

¹⁴Nā, kua kitea e tōku ringa ngā taonga o ngā iwi, ānō he kōhanga; i rite hoki ki te kohikohinga a tētahi i ngā hua manu i mahue, tāku kohikohinga i te whenua katoa; ā, kīhai i oraora te parirau o tētahi, kīhai i hāmama te māngai, kīhai hoki i pīpī.’ ”

¹⁵E whakahīhī rānei te tītaha ki te tangata nāna nei ia i whakamahi ki te hahau? E whakakake rānei te kani ki te tangata nāna nei ia i kani ai? Me te mea nei ko te patupatu hei whakakorikori i tōna kaihāpai, ko te tokotoko rānei hei hāpai i te tangata ehara nei i te rākau.

¹⁶Mō reira ka ungā mai e te Ariki, e te Ariki o ngā mano, te hīroki ki ōna mea mōmona; ā, ka kā ake a raro o tōna korōria, he mea whakaū, koia anō kei te kā o te ahi.

¹⁷Ā hei ahi te mārama o Īharaira, ā, ko tana Mea Tapu anō hoki hei mura; ā, ka wera ōna tūmatakuru, ōna tātarāmoa, pau ake i te rā kotahi.

¹⁸Ka pau anō hoki i a ia te korōria o tōna ngahere, o tāna māra mōmona, te wairua rāua ko te tinana; ā, hei te otinga, me te mea kua ngohe te ngākau o te kaihāpai kara.

¹⁹Nā, ko te toenga o ngā rākau o tōna ngahere, he torutoru, mā te tamaiti noa e tuhituhi.

²⁰I taua rā ka whakamutua e ngā toenga o Īharaira rātou ko ngā mōrehu o te whare o Hākopa, tā rātou okioki ki tō rātou kaiwhiu; engari ka okioki pono rātou ki a Ihowā, ki te Mea Tapu o Īharaira.

²¹He toenga anō e hoki mai, ko te toenga o Hākopa, ki te Atua kaha rawa.

²²Nō te mea ahakoa i rite tōu iwi, a Īharaira ki te onepū o te moana, he toenga kau o rātou e hoki mai; ko te whakaotinga i whakaritea, me te mea e puhake ana i te tika.

²³Ka oti rā hoki, ka mahia anō hoki e te Ariki, e Ihowā o ngā mano, te mea i whakaritea ki waenganui i te whenua katoa.

²⁴Nā reira tēnei kupu a te Ariki, a Ihowā o ngā mano: “E tāku iwi e noho nei i Hiona kaua e wehi i te Ahiriana; ahakoa patu ia i a koe ki te rākau, hāpainga mai rānei e ia tōna tokotoko ki a koe, pērā me tā Īhipa.

²⁵He wāhi iti rawa nei, ā, ka whakatutukitia te weriweri, tōku riri hoki, i a rātou ka hunā.”

²⁶Ka oho anō i a Ihowā o ngā mano he whiu mōna, he pērā me te patunga o Miriana ki te kāmaka ki Orepe; ā, ka iri tōna tokotoko i runga i te moana, ā, ka hāpainga e ia, pērā i tāna i Īhipa.

²⁷Nā, i taua rā ka makere atu tāna pīkaunga i tōu pokohiwi, me tāna ioka i tōu kakī, ā, ka kore noa iho anō hoki te ioka i te whakawahinga.

²⁸Kua tae ki Aiata; kua pahemo ki Mikirono; ko āna mea rongoātia ake e ia ki Mikimaha.

²⁹Kei tēnei taha rātou o te whakawhitinga, “Kua noho ā-puni rātou ki Kepa.” Pāwera noa iho a Rama: kua rere a Kipea o Haora.

³⁰Kia nui tōu reo, e te tamāhine a Karimi! Whakarongo e Raihi! He mate tōu, e Anatoto!

³¹He whati a Maramena; kei te huihui ngā tāngata o Kepimi, he tahuti.

³²Hei tēnei rā anō ka tū ia ki Nopo; kei te rūrū tōna ringa ki te maunga o te tamāhine a Hiona, ki te pukepuke i Hiruhārama.

³³Nanā, ka tapahia e te Ariki, e Ihowā o ngā mano, ngā peka, nui atu hoki te wehi; ā, ka tuaina ki raro ngā mea he tiketike nei te āhua, ka whakaititia anō hoki ngā mea whakakake.

³⁴Ka tuaina anō e ia ngā rākau pūruru o te ngahere ki te rino, ka hinga anō hoki a Repanōna i te mea nui.