2 Hamuera 22

¹I kōrerotia e Rāwiri ki a Ihowā ngā kupu o tēnei waiata i te rā i whakaorangia ai ia e Ihowā i te ringa o ōna hoariri katoa, i te ringa anō o Haora.

²I mea ia: “Ko Ihowā tōku teko, tōku pourewa, ko tōku kaiwhakaora hoki ia, āe rā, ko tōku;

³ko te Atua tōku kāmaka, ka whakawhirinaki ahau ki a ia; ko tōku whakangungu rākau, ko te haona o tōku whakaoranga, ko tōku pā tiketike, ko tōku rerenga atu; e tōku kaiwhakaora, whakaorangia ana ahau e koe i te tutū.

⁴Ka karanga ahau ki a Ihowā e tika nei kia whakamoemititia; ā, ka whakaorangia ahau i ōku hoariri.

⁵“I karapotia ahau e ngā ngaru o te mate, i whakawehia ahau e ngā waipuke o te kino.

⁶I rōritia ahau e ngā taura a te rēinga; pōtaea ana ahau e ngā māhanga a te mate.

⁷I karanga ahau ki a Ihowā i tōku pāweratanga, āe rā, i karanga ahau ki tōku Atua. Ā, i whakarongo ia ki tōku reo i roto i tōna temepara, i tae hoki tāku hāmama ki ōna taringa.

⁸“Nā, ka ngāueue te whenua, ka rū; wiri ana ngā pūtake o ngā rangi, ngāueue ana, nō te mea e riri ana ia.

⁹I kake he paowa i ōna pongaponga, ā, ka kai te kāpura o roto o tōna māngai; ngiha ana ngā waro.

¹⁰I whakapīngoretia e ia ngā rangi, ā, ka heke iho; ā, i raro te pōuri kerekere i ōna waewae.

¹¹Nā, ka eke ia ki te kerupa, ā, rere ana; inā, i kitea ia i runga i ngā parirau o te hau.

¹²I meinga anō e ia te pōuri hei tēneti ā tawhio noa, ngā wai pōuri, ngā kapua mātotoru o te rangi.

¹³Ngiha ana ngā waro i te wherikotanga o tōna aroaro.

¹⁴Papā ana te whatitiri a Ihowā ngā rangi; puaki ana te reo o te Runga Rawa.

¹⁵Kōkiritia mai ana e ia ngā pere, ā, marara ana rātou; he uira, ā, ka whati rātou.

¹⁶Nā, ka kitea ngā takere o te moana, ka takoto kau ngā pūtake o te ao i te whakatūpehupehunga a Ihowā, i te whengunga o te manawa o ōna pongaponga.

¹⁷“I tono karere mai ia i runga, ka mau ki ahau; kūmea ake ahau e ia i roto i ngā wai maha.

¹⁸Nāna ahau i whakaora i tōku hoariri kaha, i te hunga e kino ana ki ahau; he kaha rawa hoki rātou i ahau.

¹⁹Huakina tatatia ana ahau e rātou i te rā o tōku matenga; ko Ihowā ia tōku whakawhirinakitanga.

²⁰Ā, whakaputaina ana ahau e ia ki te wāhi whānui; i whakaorangia ahau e ia, nō te mea i whakaahuareka ia ki ahau.

²¹“Rite tonu ki tāku mahi tika tā Ihowā utu ki ahau; rite tonu ki te mā o ōku ringa tāna i whakahoki mai ai ki ahau.

²²I pupuri hoki ahau i ngā ara a Ihowā; ā, kīhai i hē, i whakarere i tōku Atua.

²³Kei mua tonu hoki i ahau āna whakaritenga katoa; ā, ko āna tikanga, kīhai ērā i matara atu i ahau.

²⁴I tū tika anō ahau ki tōna aroaro; i tiaki anō i ahau kei kino.

²⁵Nō reira i hōmai ai e Ihowā he utu ki ahau, rite tonu ki tōku tika; rite tonu ki tōku mā ki tāna titiro.

²⁶“He tangata atawhai, ka atawhai anō koe; he tangata tika, ka tika anō koe.

²⁷He tangata mā, ka mā anō koe; he tangata whakakeke, he whakakeke hoki tāu mahi.

²⁸E whakaorangia hoki e koe te iwi e tūkinotia ana; kei runga ia ōu kanohi i te hunga whakakake, kia whakahokia iho rātou e koe ki raro.

²⁹Ko koe hoki tōku rama, e Ihowā; mā Ihowā e whakamārama tōku pōuri.

³⁰Nāu hoki ahau i rere ai ki runga ki te rōpū; nā tōku Atua ka peke ahau i te taiepa.

³¹“Tēnā ko te Atua, tika tonu tōna ara; he parakore te kupu a Ihowā; he whakangungu rākau ia ki te hunga katoa e whakawhirinaki ana ki a ia.

³²Ko wai oti te Atua, ki te kāhore a Ihowā? Ko wai hoki te kāmaka, ki te kāhore tō tātou Atua?

³³Ko te Atua tōku pā kaha; ko ia hei ārahi i te hunga tika i tōna ara.

³⁴Ko ia nei hei mea i ōku waewae kia rite ki ō te hāta; māna hoki ahau e whakatū ki runga ki ōku wāhi tiketike.

³⁵Ko ia hei whakaako i ōku ringa ki te whawhai; hei mea i ōku ringa kia whakapiko i te kōpere parāhi.

³⁶Kua hōmai hoki e koe ki ahau te whakangungu rākau o tāu whakaoranga; whakanuia ana ahau e tōu whakaaro māhaki.

³⁷I whakanuia e koe ōku takahanga i raro i ahau, tē paheke ōku waewae.

³⁸“Kua arumia e ahau ōku hoariri, ā, hunā iho rātou e ahau; kīhai anō ahau i tahuri, ā, mōtī noa rātou.

³⁹Mōtī iho rātou i ahau, mongamonga noa, tē āhei te whakatika; inā, hinga ana rātou ki raro i ōku waewae.

⁴⁰Nāu hoki ahau i whītiki ki te kaha mō te whawhai; piko ana i a koe ki raro i ahau te hunga i whakatika mai ki ahau.

⁴¹Kua meinga hoki e koe kia hurihia mai e ōku hoariri ō rātou tuarā ki ahau, kia hunā e ahau te hunga e kino ana ki ahau.

⁴²I tirotiro rātou, heoi kāhore he kaiwhakaora; ki a Ihowā rawa, heoi kīhai ia i whakahoki kupu ki a rātou.

⁴³Nā, tukia ana rātou e ahau, ā, rite noa ki te puehu o te whenua; mōhungahunga noa rātou i ahau, me te mea he paru nō ngā huarahi; ā, tītaritaria ana rātou e ahau.

⁴⁴“Nāu hoki ahau i ora ai i ngā ngangautanga a tōku iwi; nāu ahau i tiaki hei upoko mō ngā tauiwi; hei apa mōku te iwi kāhore nei i mātauria e ahau.

⁴⁵Ka tuku mai ngā tāngata iwi kē ki raro i ahau; kia rongo kau te taringa, kakama tonu mai rātou ki ahau.

⁴⁶Ka memeha haere ngā tāngata iwi kē; ka puta wehi mai hoki i roto i ō rātou kuhunga.

⁴⁷“E ora ana a Ihowā, kia whakapaingia tōku kāmaka; kia whakanuia te Atua o te kāmaka o tōku whakaoranga.

⁴⁸Arā te Atua e rapu nei i te utu mōku, e pēhi nei i te iwi ki raro i ahau,

⁴⁹e whakaputa nei i ahau i roto i ōku hoariri. Āe rā, e mea ana koe i ahau kia teitei ake i te hunga e whakatika mai ana ki ahau, whakaorangia ana ahau e koe i te tangata tutū.

⁵⁰Mō konei ka whakawhetai ahau ki a koe, e Ihowā, i roto i ngā tauiwi, ka hīmene ki tōu ingoa.

⁵¹He pourewa whakaora ia ki tāna kīngi; e whakaputa aroha ana ki tāna tangata i whakawahi ai, ki a Rāwiri rātou ko ōna uri ake ake.”